काठमाडौँ । एभरेस्ट नेपाल कल्चरल ग्रुपले यही फागुन १८ देखि २७ गतेसम्म बाह्रौँ अन्तर्राष्ट्रिय लोक सांस्कृतिक मेला गर्ने भएको छ ।
२०८० फागुन १० गते बिहीबार आयोजित पत्रकार सम्मेलनमा ग्रुपका अध्यक्ष आरसी कोइरालाले नेपाली लोक संस्कृतिको संरक्षण तथा प्रवद्र्धन गर्ने उद्देश्यले मुख्य पर्यटकीय स्थलमा महोत्सव गर्न लागेको जानकारी दिनुभयो ।
उहाँले उक्त महोत्सवले मुलुकमा पर्यटन र संस्कृतिको प्रचारप्रसारमा सहयोग पुग्ने विश्वास व्यक्त गर्नुभयो ।
मेलामा भारत, इन्डोनेसिया, मलेसिया, पोल्यान्ड, दक्षिण अफ्रिका, अस्ट्रिया, बेल्जियम, बोस्टवाना, इस्टोनिया, जर्मनीलगायत मुलुकबाट तीन सय ५० कलाकार सहभागी हुने आयोजकले जनाएको छ ।
नेपाल प्रज्ञा–प्रतिष्ठानमा फागुन १९ गते उद्घाटन हुने महोत्सव विश्व सम्पदासूचीमा सूचीकृत हनुमानढोका दरबार क्षेत्र र पाटन दरबार क्षेत्रका साथै दाङ, कास्कीमा समेत विभिन्न सांस्कृतिक कार्यक्रम गरिने छ ।
स्थानीय लोककला, सांस्कृतिक झाँकीका साथै अन्तर्राष्ट्रिय कलाकारका प्रस्तुतिसमेत महोत्सवमा गरिने जनाइएको छ ।
