वसन्त खड्का, अर्घाखाँची ।
नेकपा (मसाल)का महामन्त्री मोहनविक्रम सिंहले नेपालमाथि अस्तक्षेप गर्न अमेरिकाले राष्ट्रिय स्वतन्त्र पार्टी (रास्वपा) को प्रयोग गरेको आरोप लगाउनुभएको छ ।
प्रगतिशील पत्रकार संघ, नेपाल अर्घाखाँचीले सोमबार सन्धिखर्कमा आयोजना गरेको पत्रकार भेटघाट कार्यक्रममा महामन्त्री सिंहले सो कुरा बताउनुभएको हो ।
नेपालमा हस्तक्षेप गर्न अमेरिकाले विगतदेखि नै विभिन्न प्रयास गर्दै आएको उल्लेख गर्दै सिंहले हालका दिनमा रास्वपाको प्रयोग गरेको बताउनुभएको हो ।
सिंहले राष्ट्रिय स्वतन्त्र पार्टी पूर्णरुपमा अमेरिकाबाट सञ्चालित भएको आरोप पनि लगाउनुभयो ।
सिंहले पूर्वराजा ज्ञानेन्द्र शाहले धर्मलाई हतियार बनाएको उल्लेख गर्दै उनको मूल उदेस्य राजा बन्नु नै भएको बताउनुभयो । यद्यपि नेकपा मसाल राजा आउनेमा विस्वस्त नभएको तर राजतन्त्र ल्याउने नाममा भैरहने अस्थिरता र अराजकताप्रति भने सतर्क रहिरहन पर्ने आजको आवस्यकता रहेको सिंहको भनाई थियो ।
यस्तै, नेपाली कांग्रेसभित्र पनि अमेरिका खेलिरहेको भन्दै सिंहले कांग्रेसको शेखर ग्रुप अमेरिकाको पक्षमा रहेको बताउनुभयो ।
अमेरिकीहरूले कांग्रेसमा देउवा पक्षलाई फालेर शेखर पक्ष हावी गराएर आफ्ना एजेन्डा स्थापित गर्न प्रयास गरिरहेको बताउनुभयो ।
यस्तै, भारतले पनि आफ्नो निर्देशनमा चल्ने मधेशवादी पार्टीहरू बनाइदिएको र सोही अनुरुप नेपालमा आफ्नो हस्तक्षेप बढाउन साम्राज्यवादी शक्तिहरु उद्दत रहेको स्पष्ट पार्नुभयो ।
भारत र अमेरिकाको मुख्य उदेस्य नेपालमा रहेर तिब्बत र चीनमाथि आक्रमण गर्ने रहेको पनि महामन्त्री सिंहको भनाइ रहेको छ ।
फरक प्रशंगमा सिंहले नेकपा मसालको वैधानिक मोर्चा राष्ट्रिय जनमोर्चाले सरकारलाई समर्थन गरेतापनि सरकारका कैयौं नीति र कार्यशैलीसँग मतभेद रहेको स्पष्ट पार्नुभयो ।
देशमा प्रतिगमनको खतरा रहेकोले प्रतिगमनका विरुद्ध मात्रै यो सरकारलाई समर्थन गरेको सिंहको भनाई थियो ।
संघीयताको विरोध गरिरहेतापनि तत्काल खारेज गर्न सक्ने आफ्नो शक्ति नभएको हुँदा तत्कालिन उपयोग गर्ने नीति अनुरुप संसदीय प्रणाली र संघीयता अनुसारका संरचनागत उपयोग गरिरहेको पनि उहाँले बताउनुभयो ।
अन्तर्राष्ट्रिय परिस्थितीको विश्लेषण गर्दै महामन्त्री सिंहले तेस्रो विश्वयुद्धको खतरा औँल्याउनुभयो । रुस युक्रेन युद्ध तेस्रो विश्वयुद्धको संकेत भएको उहाँको भनाई थियो ।
सिंहले अबको युद्ध सामान्य नभएर आणविक हतियारसहितको हुने हुँदा शान्तिको पक्षमा आवाज बुलन्द पार्ने बेला आएको बताउनुभयो ।
नेपाल लगायतका देशहरू आफू युद्धमा सहभागी नभए पनि त्यसको लपेटाबाट बच्न नसक्ने हुँदा युद्धको विरोध र शान्तिको पक्षमा आवाज उठाउनुपर्नेमा जोड दिनुभयो ।
शक्तिशाली राष्ट्रहरूको घमण्ड र अधिनायकवादी शैलीका कारण समग्र विश्व युद्धको खतरामा परेको सिंहको भनाइ छ ।
