काठमाडौँ । राष्ट्रिय जनमोर्चाले पाल्पा र कपिलवस्तुका सडक दुर्घटनका मृतकप्रति श्रद्धाञ्जली व्यक्त गरेको छ । साथै राजमोले घाइतेको यथोचित उपचार तथा मृतकका परिवारप्रति समवेदनासमेत व्यक्त गरेको छ ।
उपाध्यक्ष तथा प्रवक्ता दुर्गा पौडेलको हस्ताक्षरमा २०८० फागुन ३ गते बिहीबार जारी प्रेसवक्तव्य जारी गर्दै पार्टीले श्रद्धाञ्जली, स्वास्थ्योपचार र समवेदना व्यक्त गरेको हो ।
वक्तव्यमा दुर्घटनामा वृद्धि भइरहेकोमा चिन्ता व्यक्त गर्दै त्यसबारे गम्भीर छानबिन गरेर दुर्घटना न्यूनीकरण गर्नेतर्फ सरकारको ध्यानाकर्षण गराइएको छ ।
मृतकका परिवारलाई क्षतिपूर्ति तथा घाइतेका उपचारको व्यवस्था मिलाउनसमेत माग गरिएको प्रेसवक्तव्यको पूर्ण पाठ यस्तो छ :
“पाल्पाको तिनाउँ गाउँपालिकामा २०८० फागुन २ गते जिप दुर्घटना हुँदा १० जनाको मृत्यु भयो भने १९ जना घाइते भएका छन् । त्यस्तै, कपिलवस्तुस्थित पूर्वपश्चिम राजमार्गको सुरहीमा फागुन ३ गते राती २ बजे बस दुर्घटना हुँदा १० जनाको मृत्यु भएको छ भने ३० जना घाइते भएका छन् । त्यस्तै, कपिलवस्तुमा नै विद्यार्थीहरू बोकेको बस जुध्यो तर त्यहाँ कुनै मानवीय क्षति हुन पाएन ।
राष्ट्रिय जनमोर्चा उक्त दुर्घटनामा ज्यान गुमाउने मृतकप्रति श्रद्धाञ्जली व्यक्त गर्दै घाइतेको शीघ्र तथा यथोचित उपचार गर्दै उनीहरूको स्वास्थ्यलाभको कामना गर्दछ । त्यसैगरी मृतकका परिवारप्रति हामीले समवेदना व्यक्त गर्न चाहान्छौँ ।
गत केही दिनयता देशमा सडक दुर्घटना बढेर गएको छ । त्यो अत्यन्तै चिन्ताको विषय हो । हामीले यसरी दुर्घटना किन बढिरहेको छ ? त्यसबारे गम्भीर छानबिन गरी दुर्घटना न्यूनीकरणको ठोस उपाय गर्न सरकारसित माग गर्दछौँ । त्यसका साथै मृतकका परिवारलाई क्षतिपूर्तिको व्यवस्था मिलाउन तथा घाइतेको उपचारको व्यवस्था गर्न पनि हामीले सरकारको ध्यानाकर्षण गराउन चाहान्छौँ ।”
