कावासोती । नवलपरासी (बर्दघाट–सुस्तापूर्व) को देवचुलीस्थित शाश्वतधाममा आयोजित तेस्रो संस्करणको घडियाल काव्य उत्सवमा संरक्षणसम्बन्धी विभिन्न चार विषयमा छलफल भएको छ ।
२०८० माघ २८ गते आइतबारदेखि सुरु भएको कार्यक्रमको उद्घाटन गण्डकी प्रदेशका भूमिव्यवस्था तथा कृषिमन्त्री महेन्द्रध्वज जिसीले गर्नुभएको थियो ।
कार्यक्रमको पहिलो सत्रमा “नवलपुरमा पर्यटन : हिजो, आज र भोलि” शीर्षकमा छलफल गरिएको छ । यो छलफलमा उद्योग, पर्यटन, वन तथा वातावरण मन्त्रालय गण्डकी प्रदेशका सचिव डा रामचन्द्र कँडेल र गाउँपालिका राष्ट्रिय महासङ्घका अध्यक्ष लक्ष्मीदेवी पाण्डेसँग पत्रकार विद्रोही गिरीले छलफल गर्नुभएको थियो ।
नवलपुर क्षेत्र नारायणी नदीकिनार र चितवन राष्ट्रिय निकुञ्जसँगै जोडिएको हुनाले यस क्षेत्रलाई प्रचारप्रसार गर्न सके चितवनको सौराहाभन्दा आकर्षक गन्तव्य बनाउन सकिने छलफलमा सहभागी वक्ताहरूको भनाइ थियो ।
त्यस्तै, दोस्रो सत्रअन्तर्गत “पृथ्वीका अन्तिम डायनोसर घडियाल” शीर्षकमा शिसवार मध्यवर्ती उपभोक्ता समितिका अध्यक्ष नेत्रबहादुर पाण्डे र विश्ववन्यजन्तु कोष (डब्लुडब्लुएफ) नेपालका स्वच्छ जल कार्यक्रम अधिकृत करुण देवानसँग नेचर फोटोग्राफर सुवास अनिर्जित बस्ताकोटीले छलफल गर्नुभएको थियो ।
त्यस्तै, तेस्रो छलफलका रूपमा “मौलाकालिकादेखि त्रिवेणी : सानो जिल्लाको विराटता” शीर्षकमा त्रिवेणी गजेन्द्रमोक्ष दिव्यधाम क्षेत्र विकास समितिका कार्यकारी निर्देशक झपेन्द्रश्वर भुसाल र धार्मिक सेवा समिति, मौलाकालिका मन्दिरका अध्यक्ष शालिकराम सापकोटासँग पत्रकार रमेश बस्ताकोटीले छलफल गर्नुभयो ।
चौथो चरणमा “प्रकृति, पर्यटन र साहित्य” शीर्षकमा छलफल गरिएको छ । यो सत्रमा लेखक अमर न्यौपाने र ददी सापकोटासँग पत्रकार सूर्यप्रकाश कँडेलले छलफल गर्नुभएको थियो । लेखनका माध्यमबाट स्थान विशेषको चर्चा हुने र पाठकले त्यसलाई पछ्याउँदै आउने न्यौपानेले बताउनुभयो । मदन पुरस्कार प्राप्त आफ्नो कृति “सेतो धरती” पढेर स्वदेश र विदेशबाट पनि मानिस देवघाट आएको सन्दर्भ उहाँले सुनाउनुभयो ।
घडियाल काव्योत्सवको बाँकी छलफलमा काव्यवाचन, आँगनीमा लिट्–नेचर, सिने पर्यटन : नवलपरासीदेखि नवलपुरसम्म तथा गोलमेच पालिका बहस : लगाव र लगानी शीर्षकमा छलफल हुने बताइएको छ । सो उत्सव आज सम्पन्न हुने बताइएको छ । (रासस)
