इलाम । इलामको माई नगरपालिका–१० लुम्बाकका ६४ वर्षीय दुर्गाप्रसाद शर्मा तिम्सिना उपचारको रकम तिर्न नसक्दा अस्पतालमै बस्न बाध्य छन् ।

भारतको जेलमा लामो समय बिताएर २०७७ सालमा स्वदेश फर्काइएका उनलाई गत वर्ष परिवारले चितवनको खैरहनी नगरपालिका–११ स्थित ब्युटिफुल माइन्ड इन्स्टिच्युट अफ् साइक्याट्रिकमा उपचारका लागि भर्ना गराएका थिए ।

छ महिनाअघि नै उनको स्वास्थ्यमा सुधार आएको चिकित्सकले बताए पनि घर ल्याउन नसकिएको परिवारजनले गुनासो गरेका छन् ।

दुर्गाप्रसादका भतिजा गोपाल तिम्सिनाले भने– ‘छ महिनाअघि नै ठुलोबुबालाई घर लैजाँदा हुन्छ भनेर चिकित्सकले सल्लाह दिए पनि आर्थिक अभावले अस्पतालमै राख्नुपरेको छ ।’

गोपालले दुर्गाप्रसादको थप उपचारका लागि काठमाडौँलगायत विभिन्न स्थानबाट सहयोगको प्रस्ताव आइरहे पनि अहिले राखिएको अस्पतालबाट निकाल्न नसकिएको बताए ।

‘उपचारमा रु सात लाख १५ हजार खर्च भएको थियो’ गोपालले भने– ‘तीन लाख रुपैयाँ त बुझायौँ, बाँकी चार लाख १५ हजार रुपैयाँ नहुँदा ठुलोबुबा अस्पतालमै बस्नुपरेको छ । पैसा नतिरी उहाँलाई अस्पतालबाट ल्याउन सकिँदैन ।’

अस्पतालमा छ महिनाअघि नै चार लाख १५ हजार रुपैयाँ बाँकी भएको जनाउँदै उहाँले अहिले हिसाब कति पुग्यो थाहा थाहा नभएको बताए ।

‘अस्पतालले बारम्बार फोन गरिरहेको छ’ उनले भने– ‘ठुलोबुबालाई भारतको हाइकोर्टको आदेशअनुसार दिइएको रकम पनि यसअघिकै उपचारमा धेरै खर्च भइसकेको छ ।’

अस्पतालका अध्यक्ष डा गिरिराज भन्टानाका अनुसार दुर्गाप्रसादमा देखिएको रोग सिजिफोर्नियाँ हो ।

उनले भने– ‘शत्प्रतिशत निको भएको त होइन तर उहाँमा जति सुधार हुनुपर्ने हो, त्यति भइसकेको छ ।’

उनले दुर्गाप्रसाद अब पहिलाभन्दा सामान्य जीवन बिताउन सक्ने र अरूले भनेको काम गर्नस क्ने भएको जानकारी दिए ।

जेलबाट छुटेर आएपछि दुर्गाप्रसादलाई मानसिक समस्या देखिएकाले विराटनगरमा समेत १७ दिन उपचार गरिएको र त्यहाँको उपचारले निको नभएपछि चितवन लगिएको हो ।रासस