काठमाडौँ । भक्तपुरको सूर्यविनायक नगरपालिका–१० नलिन्चोकबाट अवैध हतियार र लागुऔषध खैरो हेरोइनसहित दुई जना पक्राउ परेका छन् ।
पक्राउ पर्नेमा इलामको इलाम नगरपालिका–९ का ४१ वर्षीय चिरञ्जीवी सिन्चुरी र नवलपुरको कावासोती नगरपालिका–२ का ३१ वर्षीय लेख बहादुर कार्की रहेका छन् ।
नलिन्चोक एरियामा अवैध हतियार तथा लागुऔषधको ओसारपसार तथा कारोबार हुँदै छ भन्ने गोप्य सूचनाका आधारमा काठमाडौँ उपत्यका अपराध अनुसन्धान कार्यालयबाट विशेष टोली खटिएको थियो ।
सिन्चुरी र कार्कीलाई शङ्का लागि सोधपुछ गर्ने क्रममा उनीहरूको साथबाट केएफ ७.६५ लेखिएको ५ राउन्ड गोली लोड भएको म्याग्जिनसहितको एक थान पेस्तोल, सोही पेस्तोलमा लाग्ने खाली एक थान म्याग्जिन र लागुऔषध खैरौ हेरोइन जस्तो देखिने लेसिलो पदार्थ पाँच ग्राम फेला पारेको प्रहरीले जनाएको छ।
पक्राउ परेका उनीहरूलाई लागु औषध तथा हातहतियार खरखजानासम्बन्धी कसुरमा आवश्यक कारबाही तथा थप अनुसन्धानको लागि प्रहरी वृत जगाती भक्तपुरमा पठाइएको छ ।
