गोपालप्रसाद भट्टराई, सन्धिखर्क ।
मकैभन्दा पोस्कर (खोस्टा) ले मूल्य बढी पाउन थालेपछि अर्घाखाँचीको भूमिकास्थानका नागरिकको अतिरिक्त आम्दानी हुन थालेको छ ।
आफ्नै बारीमा फलेको मकैबाट निस्किएको पोस्करबाट मूल्यवान हस्तकला सामानबाट नसोचेको अतिरिक्त आम्दानी हुन थालेको हो ।
सुकेको पोस्करकै प्रतिकिलो एक सय ५० रुपैयाँ, पोस्करबाट बनेको टोपी प्रतिथान छ सय रुपैयाँ र झोला प्रतिथान पाँच सय रुपैयाँमा बिक्री हुन थालेपछि भूमिकास्थानका सर्वसाधारण दङ्ग भएका छन् ।
गाईभैँसीलाई घाँस हाल्ने, नखाए खेर फाल्ने मकैको पोस्कर (खोस्टा) बाट टोपी, झोला र ढक्की जस्ता सामान बनाउने सिप सिकाएर तयारी सामान नगरपालिकाले खरिद गरिदिने भएपछि भूमिकास्थानका किसानमा अर्को खुसी थपिएको छ ।
नगरपालिकाले चालु आर्थिक वर्ष २०८०/८१ देखि सञ्चालनमा ल्याएको ‘कर्मशील जनशक्ति परिचालन कार्यक्रम’ अन्तर्गत पहिलो चरणमा बाँझो जग्गामा व्यावसायिक खेती कार्यक्रम सञ्चालन गरेको छ भने दोस्रो चरणमा पोस्कर र थाकलको पातबाट हस्तकलाका सामान तयार गर्ने जनशक्ति उत्पादन गरेको छ । मकैको पोस्कर र थाकलको पातबाट झोला, टोपी र ढक्की बनाउने ३० दिने तालिमबाट नगरपालिकामा एक सय जना कर्मशील जनशक्ति तयार भएका छन् ।
प्रत्येक वडाबाट १० जनाका दरले एक सय जनाले तालिम लिएर कर्मशील जनशक्तिको रूपमा काम गर्न योग्य भएको नगरपालिकाका नगरप्रमुख झविलाल थापाले जानकारी दिनुभयो ।
ओम राजश्री मल्टिएग्रो प्रालि काठमाडौँको प्राविधिक सहयोगमा नगरपालिकाले १० ओटै वडामा सञ्चालन गरेको पहिलो चरणको ३० दिने तालिम मङ्सिर २४ गतेबाट समापन गरिएको नगरप्रमुख थापाले जानकारी दिनुभयो ।
‘खेर जाने पोस्करबाट आम्दानी दिने सामग्री बनाउन हामीले अभियान चलाएका छौँ’ नगर प्रमुख थापाले भन्नुभयो– ‘यहाँका नागरिक पनि हाम्रो अभियानलाई साथ दिंदै व्यावसायिक रूपमै काममा लाग्ने योजना बनाउन थाल्नुभएको छ ।’
उहाँले अगाडि थप्नुभयो– ‘सबैलाई उत्पादनमा जोडेर भूमिकास्थानलाई समृद्ध बनाउने छौँ ।’
३० दिने तालिमकै समयमा प्रयोग भएको पोस्कर र तयार भएका हस्तकलाका सामग्रीसमेत नगरपालिकाले खरिद गरी पैसा दिन थालेपछि व्यावसायिक रूपमै पोस्करका सामग्री बनाउन भूमिकास्थानका किसानको रहर जागेको नगरपालिकाका प्रमुख प्रशासकीय अधिकृत खिमानन्द आचार्यको भनाइ छ ।
नगरपालिकाको आयोजनामा तालिमप्राप्त कर्मशील जनशक्तिले तयार पारेका पोस्कर र थाकलको पातबाट बन्ने सामग्री ओम राजश्री मल्टिएग्रो प्रालि काठमाडौँले बजारीकरण गर्ने गरी सम्झौता भएको भूमिकास्थानका योजनाशाखा अधिकृत हरिश्चन्दू भुसालले जानकारी दिनुभयो ।
उहाँका अनुसार ३० दिने तालिमबाट तयार भएको जनशक्तिले १५ दिन सामूहिक रूपमा सामग्री बनाउने छन् भने त्यसपश्चात् ओम राजश्रीले सात दिन पुन: रिफ्रेसिङ तालिम दिने छ । उक्त तालिमपछि भूमिकास्थानका १० ओटै वडामा तयार भएका सामग्रीलाई सङ्कलन गर्न भूमिकास्थान कोशेलीघर स्थापना गरी बजारीकरण गरिने नगरपालिकाले जनाएको छ ।
कर्मशील जनशक्ति परिचालनबाट तयार हुने सामग्री तथा उपजको बजारीकरणको ग्यारेन्टी भएसँगै भूमिकास्थानका सर्वसाधारणको आन्तरिक आम्दानी बढ्ने, स्वरोजगारको सिर्जना हुने र बसाइँसराइ रोकिने आँकलन गरिएको छ ।
भूमिकास्थानका १० ओटा वडाका सहभागीलाई समेटेर पाँच ठाउँमा सञ्चालन गरिएको पोस्करबाट सामान बनाउने ३० दिने तालिम मङ्सिर २४ गते आइतबारबाट समापन गरिएको छ ।
भुमिकास्थान नगरपालिकाका सबै जनप्रतिनिधि, कर्मचारी र स्थानिय सरोकारवालाको सक्रिय सहभागितामा गराइएको तालिम निकै फलदायी भएको र प्रतिफलसमेत परिणाममुखी आउने देखिएको भूमिकास्थानका कम्प्युटर अधिकृत शेषकान्त घिमिरे ओसनको दाबी छ ।
