बागलुङबजार । राष्ट्रिय जनमोर्चाका अध्यक्ष तथा प्रतिनिधिसभाका सांसद चित्रबहादुर केसी ‘जनतासँग जनप्रतिनिधि’ कार्यक्रम सम्पन्न गर्न बागलुङ पुग्नुभएको छ ।
सङ्गठनको आन्तरिक कार्यक्रम सम्पन्न गरेपछि मङ्सिर २५ गतेदेखि मङ्सिर ३० गतेसम्म आयोजित विभिन्न कार्यक्रम सम्पन्न गर्न उहाँ बागलुङ पुग्नुभएको हो ।
राजमो पूर्व केन्द्रीय सचिव तथा अध्यक्ष केसीका स्वकीय सचिव कृष्ण अधिकारीका अनुसार बागलुङमा विनियोजन भएका बजेट, सो बजेअनुसारका विभिन्न विकास निर्माण योजना कार्यान्वयन भए/नभएको अनुगमन र जनता तथा जनप्रतिनिधिको गुनासो सुन्न अध्यक्ष केसी बागलुङ पुग्नुभएको छ ।
नेता अधिकारीले भन्नुभयो– ‘मङ्सिर ३० गतेसम्म अध्यक्ष केसीले बागलुङमा रहेर विनियोजन भएका बजेटअनुसारका विकास निर्माणका काम भए/नभएको अनुगमन तथा जनता र जनप्रतिनिधिको गुनासो पनि सुन्नुहुने छ ।’
‘जनतासित गुनासो सुन्ने क्रममा अध्यक्ष केसीले देशको वर्तमान राजनीतिक अवस्थाबारे जानकारी गराई रहनुभएको छ’ अध्यक्ष केसीलाई उद्धृत गर्दै अधिकारीले युगदर्शनसित भन्नुभयो– ‘अहिलेको गणतन्त्रबाट जनताको अपेक्षा पूरा नभए पनि गणतन्त्रको विकल्प राजतन्त्र हुन सक्दैन । गणतन्त्रको विकल्प गणतन्त्र नै हो भन्ने अभिव्यक्ति अध्यक्ष केसीले दिनुभएको छ ।’
अधिकारीका अनुसार अन्तरक्रिया गर्ने क्रममा अध्यक्ष केसीले जनताको जनचेतनाबिना सुशासन कायम हुन नसक्ने पनि बताउनुभएको छ ।
अध्यक्ष केसीले भन्नुभएको छ– ‘जनताको खबरदारीपूर्ण सचेतनाबिना सुशासनको परिकल्पना नै गर्न सकिन्न । सुशासनका लागि जनताको चेतनास्तर माथि उठ्नैपर्छ ।’
अध्यक्ष केसी मङ्सिर २२ गते बिहान काठमाडौँबाट बागलुङ पुग्नुभएको थियो ।
मङ्सिर २३ गते उहाँ राजमो बागलुङको जिल्ला समितिको बैठकमा सहभागी हुनुभएको थियो । सोही दिन उहाँ बागलुङबजारमा आयोजित सर्वदलीय बैठकमा सहभागी हुनुभएको थियो ।
आजै मङ्सिर २४ गते अध्यक्ष केसीले धौलागिरी अस्पताल र धौलागिरी बहुमुखी क्याम्पसको अनुगमन गर्नुभएको थियो । त्यसभन्दा अघि उहाँले बागलुङबजारमा आयोजित महिला हिंसा विरुद्ध १६ दिने अभियानसम्बन्धी कार्यक्रममा आतिथ्य ग्रहण गर्नुभएको थियो । सो कार्यक्रमको आयोजना जिल्ला प्रशासन कार्यालय बागलुङले गरेको थियो ।
आजै उहाँ मानव अधिकार आयोगद्वारा आयोजित प्रभातफेरी कार्यक्रममा पनि सहभागी हुनुभएको थियो । त्यस्तै उहाँले जिल्ला प्रशासन कार्यालयका कर्मचारीसित कामको अनुगमनसमेत गर्नुभएको थियो ।
अभियानका सहभागी
‘जनतासँग जनप्रतिनिधि’ कार्यक्रममा सम्बन्धित क्षेत्रका राजमो नेता तथा जनप्रतिनिधिको सहभागिता रहेको छ ।
नेता अधिकारीका अनुसार अध्यक्ष केसीसँग जिल्ला समन्वय समिति बागलुङका अध्यक्ष अमर थापा, राजमो बागलुङका अध्यक्ष तथा काठेखोला गाउँपालिकाका उपाध्यक्ष तिलक थापा, जैमिनी नगरपालिकाका मेयर नरबहादुर पुन, बरेङ गाउँपालिकाका अध्यक्ष कृष्ण शर्मालगायतका राजमो नेताकार्यकर्ताको सहभागिता छ ।
आगामी कार्यक्रम
अभियानअन्तर्गत मङ्सिर २५ गते सोमबार बिहान बागलुङ नगरपालिकाका मेयरसहितका जनप्रतिनिधिसँग अन्तरक्रिया कार्यक्रम सम्पन्न गर्ने कार्यक्रम रहेको छ । दिउसो उहाँ काठेखोला गाउँपालिका पुग्नुहुने छ ।
मङ्सिर २६ गते मङ्गलबार बिहान अध्यक्ष केसीको कार्यक्रम काठेखोलाको तङ्ग्राममा निश्चित गरिएको छ भने सोही दिन दिउसो उहाँ हटिया र मल्ममा जनताका गुनासो सुन्ने तथा अन्तरक्रिया र अनुगमन कार्यक्रममा सहभागी हुनुहुने छ ।
अध्यक्ष केसी मङ्सिर २७ बुधबार बिहान दुदिलाभाटी पुग्नुहुने छ भने दिउसो बरेङ गाउँपालिकामा पुगेर विभिन्न कार्यक्रममा सहभागी हुनुहुने छ ।
मङ्सिर २८ र २९ अध्यक्ष केसीले जैमिनी नगरपालिकाका विभिन्न वडामा अन्तरक्रिया, अनुगमन र जनगुनासो सुन्ने कार्यक्रममा सहभागी हुनुहुने छ ।
त्यसैगरी, मङ्सिर ३० गते उहाँ बागलुङ नगरपालिकाको वडा नम्बर १२, १३ र १४ बलेवा एरियामा जनभेटघाट कार्यक्रममा सहभागी हुनुहुने छ ।
