विराटनगर । स्मृतिशेष साहित्यकार तथा लेखक रमेश लामाको स्मृतिमा स्मृतिग्रन्थ सार्वजनिक भएको छ ।
रमेश लामा स्मृति प्रतिष्ठानको आयोजनामा २०८० मङ्सिर १३ गते बुधबार बेलबारीको धनपालगढी सभाकक्षमा सो कार्यक्रम सम्पन्न भएको हो ।
वरिष्ठ साहित्यकार तथा पूर्व सांसद हर्कमान तामाङको प्रमुख आतिथ्यमा सम्पन्न सो कार्यक्रममा पूर्व सांसद घनश्याम खतिवडा, संविधानसभा सदस्य मधु गुरुङ, बेलबारी नगरप्रमुख दिलप्रसाद राई, बेलबारी नगर उपप्रमुख नितु थापा र वरिष्ठ कवि अनिल पौडेलको विशिष्ट आतिथ्य रहेको थियो ।
कार्यक्रममा पत्रकार तथा समाजसेवी हरिकान्त पौडेल, लेखकहरू घनश्याम गौतम, शिवप्रसाद बराल, परशुराम सुवेदी, समाजसेवी शङ्कर गुरुङ र छत्र लिम्बु, वडा नम्बर ३ का अध्यक्ष योगेन्द्र सुवेदी, बेलबारी प्रज्ञा–प्रतिष्ठानकी अध्यक्ष रेखा सुवेदी, स्रष्टा समाजका अध्यक्ष जेबी थुलुङ र बेलबारी साहित्य विकास समितिकी अध्यक्ष तिला लेकालीको पनि आतिथ्य रहेको थियो ।
प्रतिष्ठानकी अध्यक्ष सावित्रा राईको अध्यक्षता तथा रमेश निरौलाको सञ्चालनमा अघि बढेको सो कार्यक्रममा स्मृतिग्रन्थका सङ्कलक तथा सम्पादक ईरानराईले स्वागत गर्नुभएको थियो ।
आयोजक संस्थाका अनुसार स्मृतिशेष लामाको जन्म २००५ भदौ ३० गते खोटाङमा तथा मृत्यु २०७८ माघ १९ गते भएको थियो ।
उहाँका तामाङ तथा नेपाली भाषामा साहित्य र शब्दकोशलगायत विभिन्न रचना प्रकाशित भइसकेका छन् । उहाँले विभिन्न पत्रिका पनि सम्पादन गर्नुभएको थियो ।
उहाँले विभिन्न राजनीतिक, सामाजिक, जनजातीय, शैक्षिक, साहित्यिक, सांस्कृतिक जिम्मेवारीसमेत निभाउनुभएको थियो ।
