काठमाडौँ । सरकारले सामाजिक सञ्जाल टिकटक बन्द गर्ने निर्णय गरेको छ ।
टिकटकका कारण सामाजिक सद्भाव बिथोलिने गतिविधि बढिरहेको निष्कर्ष निकाल्दै नेपालभित्र टिकटक बन्द गर्ने निर्णय गरिएको हो ।
प्रधानमन्त्री निवास बालुवाटारमा २०८० कात्तिक २७ गते सोमबार बसेको मन्त्रिपरिषद् बैठकले उक्त निर्णय गरेको सरकारका प्रवक्ता एवम् सञ्चार तथा सूचना प्रविधिमन्त्री रेखा शर्माले जानकारी दिनुभयो ।
‘हाम्रो पारिवारिक संरचना, सामाजिक सम्बन्धलाई खल्बल्याउने गरी टिकटकबाट लगातार प्रचारप्रसार भइरहेका छन् । यसलाई नियन्त्रण गर्न तत्कालका लागि टिकटक बन्द गर्ने निर्णय गरेको हो’ उहाँले भन्नुभयो ।
बैठकले यसको प्राविधिक व्यवस्थापनको पाटो मिलाउन सञ्चार मन्त्रालयलाई निर्देशन दिएको छ ।
‘टिकटक बन्द गर्ने निर्णय आजै भइसक्यो । प्राविधिक पक्ष मिलाउनुपर्ने भएकाले सम्बन्धित व्यक्ति लागिरहनुभएको छ’ मन्त्री शर्माले भन्नुभयो– ‘सञ्चार मन्त्रालय र दूरसञ्चार प्राधिकरणले यसबारे तयारी थालिसकेको छ । सम्भवत: आजैदेखि बन्द हुन्छ ।’
पछिल्लो समय सामाजिक सञ्जाल टिकटकमा सामाजिक, धार्मिक तथा साम्प्रदायिक सम्बन्धलाई खल्बल्याउने गतिविधि बढिरहेकाले त्यसलाई तत्काल नियन्त्रण गर्न सरकारले आवश्यक व्यवस्था गर्नुपर्ने आवाज उठिरहेको थियो ।
नेपालमा मात्रै होइन टिकटक बन्द भएको
टिकटक बन्द गर्ने नेपाल एक्लो देश होइन । यसअघि भारत, अस्ट्रेलिया, बेल्जियम, क्यानडा, नर्वे, न्युजिल्यान्ड, डेनमार्कलगायतका देशले पनि टिकटक बन्द गरेका छन् ।
भारतले सन् २०२० मा नै टिकटक सहितका ५८ ओटा चिनियाँ एपमाथि प्रतिबन्ध लगाएको थियो ।
चीन–भारत सीमामा दुई देशका सेनामाझ तनाव बढेपछि भारतले भारतको सम्प्रभुता, भारतको सुरक्षामा खतरा पैदा भएकाले टिकटकसहितका चिनियाँ एप बन्द गरेको बताएको थियो ।
सन् २०२२ मा अफगानिस्तानमा सरकारमा आएलगत्तै तालिबानले इस्लामिक कानुन विपरीत रहेको भन्दै टिकटक बन्द गरेको थियो ।
डेनमार्कले गत मार्चमा आफ्ना कर्मचारीलाई काम गर्ने डिभाइसमा टिकटक चलाउन रोक लगाएको थियो ।
अस्ट्रेलिया, बेल्जियम र क्यानडाले पनि सबै सरकारी मोबाइल डिभाइसमा टिकटक चलाउन रोक लगाएका छन् ।
