तौलिहवा । रक्तिम सांस्कृतिक अभियान केन्द्रीय समितिको प्रगतिशील देउसीभैलो कार्यक्रम–२०८० कपिलवस्तुमा सुरु भएको छ । त्यसको उद्घाटन कपिलवस्तुको खरेन्द्रपुरमा गरिएको छ ।
२०८० कात्तिक २६ गते आइतबार रक्तिमका अध्यक्ष गिरिप्रसाद बुढाले उद्घाटन गरेसँगै प्रगतिशील देउसीभैलो कार्यक्रम सुरु भएको हो ।
कार्यक्रमको उद्घाटन अध्यक्ष बुढाले मैनबत्ती बालेर गर्नुभएको थियो ।
सो अवसरमा राष्ट्रिय जनमोर्चा कपिलवस्तुका सचिव केरसिंह अदैले सङ्क्षिप्त मन्तव्य राख्नुभएको थियो ।
कार्यक्रममा रक्तिमका केन्द्रीय सल्लाहकार थुमराज ढुङ्गाना, अखिल (छैठौंं) का केन्द्रीय सदस्य रिसव आचार्य, रक्तिम कपिलवस्तुका अध्यक्ष बेगम बुढाको समेत आतिथ्य रहेको थियो ।
अध्यक्ष बुढाको अध्यक्षतामा अघि बढेको उक्त कार्यक्रमको सञ्चालन रक्तिमका केन्द्रीय सदस्य मानबहादुर नेपालीले गर्नुभएको थियो ।
कार्यक्रमको सुरुआतमा ज्ञातअज्ञात सहिद तथा जाजरकोट भूकम्पमा ज्यान गुमाएकाप्रति एक मिनेट मौनधारण गरिएको थियो ।
प्रगतिशील देउसीभैलोका लागि कपिलवस्तुमा दुई हप्ताअघिदेखि रिहर्सल सुरु गरिएको थियो । त्यसका लागि रक्तिम केन्द्र र जिल्ला समितिका कलाकारको भेला भएको थियो ।
रिहर्सलमा रक्तिमका केन्द्रीय अध्यक्ष बुढा, केन्द्रीय सदस्य मञ्जु परिवार, केन्द्रीय सल्लाहकार थुमराज ढुङ्गाना, रक्तिम केन्द्रका दीपक पन्थी, मानबहादुर नेपाली र विकास विष्ट, रक्तिमका जिल्ला अध्यक्ष बुढा, रक्तिमका जिल्ला प्रशिक्षक टिना अदै र सञ्जिला बुढामगरको सहभागिता रहेको थियो ।
त्यसैगरी, रिहर्सलमा पूजा कुँवर, सावित्री परिवार, बिनिता पौडेल, बिहान अदै, साजन कुँवर, पूजा पोखरेल, भावना पोखरेल, सुशान्त पौडेललगायतका कलाकारको पनि सहभागिता रहेको थियो ।
रिहर्सलको क्रममा रक्तिमका १५ ओटा उत्कृष्ट गीतमा प्रस्तुतिको तयारी भएको थियो ।
आइतबार खरेन्द्रपुरमा उद्घाटन भएको एक टोली शिवराज, विजयनगर र कृष्णनगर पालिकाका विभिन्न स्थानमा देउसीभैलो खेल्ने छ । त्यस क्षेत्रको नेतृत्व राजमो जिल्ला सचिव केरसिंह अदै र राजमो जिल्ला कोषाध्यक्ष केहरसिंह पुनमगरले गर्नुहुने छ ।
बुद्धभूमि नगरपालिकामा खेलिने टोलीको नेतृत्व राजमो जिल्ला सदस्य नरबहादुर घर्तीमगर, डिलाराम भुसाल र मीना पोखरेलले गर्नुहुने छ ।
वाणगङ्गा नगरपालिकामा सञ्चालन हुने भैलो टोलीको नेतृत्व राजमो जिल्ला अध्यक्ष रामप्रसाद बेल्बासे, उपाध्यक्ष दलबहादुर कुँवर, जिल्ला सचिवालय सदस्य माधव भाटक्षत्री र ऋषिराम पोखरेलले गर्नुहुने छ ।
कपिलवस्तु नगरपालिका र मायादेवी गाउँपालिकामा सम्पन्न हुने भैलो टोलीको नेतृत्व अखिल नेपाल किसान महासङ्घ (अप्फा) का केन्द्रीय उपाध्यक्ष शिव पौडेल र राजमो वरिष्ठ सदस्य दधिराम आचार्यले गर्नु हुने छ ।
देउसीभैलो कार्यक्रम तिहारको भोलिपल्टसम्म खेलिने राजमो जिल्ला सचिव अदैले जानकारी गराउनुभयो ।
