नयाँ दिल्ली । मूल प्रवाह अखिल भारत नेपाली एकता समाजले आफ्नो ४५औं स्थापना दिवस मनाएको छ । केन्द्रीय समितिले बदरपुरस्थित समाजको कार्यालयमा र अन्य विभिन्न नगरहरुमा पनि स्थापना दिवसको कार्यक्रम सम्पन्न भएका छन् ।
केन्द्रीय समितिको आयोजनामा सम्पन्न ४५औं स्थापना दिवसको समारोहलाई सम्बोधन गर्दै समाजका केन्द्रीय अध्यक्ष ठाकुर खनालले संगठनको कुनै व्यक्ति छ वा छैन भन्ने कुराले संगठनको लक्ष्य र उदेश्यमाथि कुनै प्रकारको अबरोध नहुने स्पष्ट पानर्जुभयो ।
‘आज हामीले भारत व्यापी रुपमा ४५औं स्थापना दिवस मनाइरहेका छौं, तर संगठनका कैयौं स्थांपकहरु जिवित हुनुहुन्न भने भएकाहरु पनि हामीसँग हुनुहुन्न’ खनालले भन्नुभयो, ‘संगठनको कुन व्यक्ति छ वा छैन भन्ने कुराले संगठनको लक्ष्य र उदेश्यमाथि कुनै प्रकारको अबरोध उत्पन्न हुँदैन । ‘मूल प्रवाह’ नै एकता समाजको ‘मूल प्रवाह’ हो ।’
मूल प्रवाह अखिल भारत नेपाली एकता समाजले नै एकता समाजको लक्ष्य र उदेश्यमा नीहित रहेर अगाडि बढिरहेको अध्यक्ष खनालको भनाई थियो ।
एकता समाजको स्थापना केवल सात जना व्यक्तिहरुको जोड भएको थियो भनिएता पनि त्यसको पछाडि कैयौंले योगदान पुर्याउनु भएको थियो । एकता समाजलाई फलाउन फूलाउन स्वदेशबाट आएका कैयौं नेता एवं कलाकारहरुलाई स्थापना दिवसको अवसरमा धन्यवाद प्रकट गर्नुभयो ।
उहाँहरुले एकता समाज फलाउन फूलाउन पुर्याउनु भएको महत्वपूर्ण योगदानलाई सदा स्मरण गरिने अध्यक्ष खनालले बताउनुभयो । संगठन विस्तारका दौरानमा साहदत प्राप्त गर्नुभएका नेता कार्यकर्ताहरु सरोज शर्मा, गंगाधर घिमिरे, जलजला, हरिलाल शर्मा, वाशुदेव भुसाल, लिलानाथ कुशुम, मित्रलाल भुसाल, खड्क बहादुर जिसी, रुकबहादुर केसी लगायतलाई स्थापना दिवसको अवसरमा स्मरण गर्नुभयो । 
‘कतिपय व्यक्तिहरुले एकता समाजको स्थापना केवल सामाजिक कार्यका लागि स्थापना गरिएको थियो भन्दै हिँड्ने गरेता पनि वास्तवमा यसको स्थापना राजनीतिक उदेश्यसँग जोडिएर नै भएको हो’ अध्यक्ष खनालले भन्नु भयो, ‘अहिले पनि कतिपय तत्वहरुले एकता समाजलाई लक्ष्य र उदेश्यबाट विचलित बनाउने र आफ्नो निहित स्वार्थ एवं महत्वाकांक्षा पूर्ति गर्ने उदेश्यले सञ्चालन गर्न चाहनेहरुले आफूलाई खाँटी एकता समाज भएको बताउँदै दिगभ्रमित बनाउने कोशिसमा लागेका छन् ।’
यस्ता तत्वहरुलाई कम्जोर नठान्न पनि आफ्ना कार्यकर्ताहरुलाई अध्यक्षले सचेत गराउनुभयो ।
४४औं वर्षको अवधिमा संगठनले भारतमा रहेका नेपालीहरुको बीचमा सामाजिक आन्दोलनको सम्वाहकको साथसाथै एउटा विश्व विद्यालयको रुपमा पनि भूमिकाको निर्वाह गरेको खनालको भनाई थियो ।
‘कैयौं व्यक्तिहरुलाई न्याय दिने सावालमा अहिले पनि मूल प्रवाह अग्रपंक्तिमा रहँदै आएको छ । उनीहरुलाई राजनीतिक चेत प्रदान गर्ने सवालमा पनि मूल प्रवाह अनुशासित रुपमा अगाडि बढिरहेको छ’ खनालले भन्नु भयो, ‘अहिले पनि मूल प्रवाह भारतका करिब २५० भन्दा बढि शहरहरुमा अनवरत रुपमा श्रमजीवि नेपालीहरुका बीचमा विभिन्न खाले असामाजिक तत्वहरुलाई परास्त गर्दै अगाडि बढिरहेको छ ।’
उपाध्यक्ष कपिल खनालको अध्यक्षता र केन्द्रीय सदस्य शिव केसीको सञ्चालनबाट अगाडि बढेको सो कार्यक्रममा ज्ञातअज्ञात शहिदहरुको सम्झनामा एक मिनेट मौनधारण पछि केन्द्रीय सचिवालय सदस्य धनवीर पुन मगरले स्वागत गर्नुभएको थियो ।
कार्यक्रमलाई तराई जनवादी मोर्चाका महासचिव राजाराम चौधरी, रक्तिम साँस्कृतिक अभियान केन्द्रीय समितिबाट मीना बुढाथोकी, पश्चिमोत्तर क्षेत्रीय समितिका सदस्य पिनु थापा मगर, फरीदावाद नगर समितिबाट सूर्यबहादुर क्षेत्री, पूर्वी दिल्ली नगर समितिबाट चक्रसिंह केसी, गुडगाव नगर समितिबाट गोपाल भट्टराई, नयाँ दिल्ली नगर समितिबाट दिनेश पन्थीले शुभकामना दिनुभएको थियो ।
