हरिद्वारा (भारत) । भारतको उत्तराखण्ड राज्यको हरिद्वारबाट एक नेपाली वृद्ध हराएको जानकारी प्राप्त भएको छ ।
हराएका ६४ वर्षीय मुनु बुढा अक्टोबर ३०, २०२३ देखि बेपत्ता भएका हुन् ।
मूल प्रवाह अखिल भारत नेपाली एकता समाज हिमाचल राज्य समितिका सहसचिव मिथुन सिंहले दिनुभएको जानकारीअनुसार नेपाल तातोपानी गाउँपालिका–७ ताम्ती, जुम्ला निवासी बुढा शिमलास्थित ठियोगमा रोजगारीको सिलसिलामा बस्दै आएका थिए ।
अक्टोबर २९ का दिन बुढा एउटा चिन्ने व्यक्तिसँग स्वदेश जानका लागि शिमलाबाट हरिद्वार जाने बसमा चढेका थिए । बसमा उनको दुई अन्य नेपाली यात्रुसँग चिनजान भएको बताइएको छ । अक्टोबर ३० का दिन बिहान ८ बजे हरिद्वार पुगेपछि उनी आफ्नो सामानको साथमा आएको व्यक्तिलाई छोडेर बसमा चिनजान भएका दुई नेपाली यात्रुसँग हिँडेपछि बेपत्ता भएको बताइएको छ ।
हराएका बुढाको साथमा आएका व्यक्तिले केही बेर उनको प्रतीक्षा गरेको तर न त उनी फिर्ता आए, न उनी दुई जना नेपाली फर्के ।
उनीहरू केही बेरसम्म नफर्केपछि बुढाका साथीले वरपर खोज्ने धेरै प्रयास गरेको तर कुनै अत्तोपत्तो नलागेपछि साथ आएका व्यक्तिले बुढा उनी दुवै जना नेपालीसँग हिँडेपछि बेपत्ता भएको सूचना हिमाचलमा बस्ने उनको भतिजा ठन्डीराज बुढालाई दिएका थिए ।
ठन्डीराज बुढाले काका बुढाको खोजीमा सहयोगका लागि मूल प्रवाह नगर समिति रिकाङपिओमा निवेदन दिएपछि समितिका पदाधिकारीले आफ्नो स्तरमा बुढाको खोजीमा छन् ।
६४ वर्षीय वृद्ध बुढा अपरिचित दुई जनासँग सम्पर्कविहीन भएपछि उनीसँग कुनै अप्रिय घटना हुन सक्ने चिन्तामा परिवार र आफन्त छन् । उनका भतिजा ठन्डीराजले हिमाचलसहित भारतभरि रहेका सम्पूर्ण नेपाली सङ्घसंस्थाका साथै सम्पूर्ण नेपाली समुदायसँग निजको खोजीमा सहयोगका लागि अपिल गरेका छन् ।
निजलाई कसैले कहीँ कतै देखेमा नजिकको प्रहरीचौकी वा ठन्डीराज बुढा, फोन ८८९४६७०९७९ वा मिथुन सिंह (मूल प्रवाह) ७०१८५८५६४९ मा जानकारी गराउन अनुरोध गरिएको छ ।
