काठमाडौँ । नेकपा (मसाल) ले प्यालेस्टाइनको गाजापट्टीस्थित एक अस्पतालमा भएको बमबारीलाई इतिहासकै अमानवीय नरसंहारको संज्ञा दिएको छ ।
महामन्त्री मोहनविक्रम सिंहको हस्ताक्षरमा २०८० असोज ३ गते शुक्रबार जारी प्रेसवक्तव्यमा पार्टीले यस्तो धारणा व्यक्त गरेको हो ।
वक्तव्यमा मृतक सबैप्रति श्रद्धाञ्जली व्यक्त गर्नुका साथै हमलाका लागि जिम्मेवार पक्षका घोर निन्दा र भत्र्सना गरेको छ ।
उक्त हमला इजरायल पक्षद्वारा गरिएको आशङ्का व्यक्त गर्दै वक्तव्यमा अमेरिकी साम्राज्यवादका कारणले नै त्यहाँ युद्ध भइरहेको ठहर गरेको छ । त्यस्तै, अहिलेको युद्धको विरोधमा अरब मुलुककबाट विरोधको आवाज उठेकोमा त्यसको समर्थन गरिएको छ ।
यस्तो छ, प्रेसवक्तव्यको पूर्ण पाठ :
“गाजापट्टीको एउटा अस्पतालमा भएको बमबारी र त्यहाँ ५ सयभन्दा बढी बिरामी, महिला र बालबालिकासमेतको हत्या निश्चित रूपले इतिहासको नै अत्यन्त ठुलो अमानवीय नरसंहार हो । त्यो घटनाको लागि हामीले मृत सबै व्यक्तिप्रति श्रद्धाञ्जली प्रकट गर्नुका साथै त्यो बमबारीका लागि जिम्मेवार पक्षप्रति घोर निन्दा र भत्र्सना गर्दछौँ ।
गाँजापट्टीमा भएको त्यो नरसंहारका लागि इजरायल र अमेरिका पक्षले हमासलाई नै जिम्मेवार बताइरहेका छन् तर स्वयम् हमासले नै आफ्नो भूमिमा त्यस प्रकारको हमला गरेको आरोप लगाउनुका पछाडि अलिकति पनि सत्यता देखिँदैन । त्यसैले यो सोच्नका लागि पूरा आधार छ कि त्यो हमला इजरायल पक्षद्वारा नै गरिएको हो । उनीहरूले गाजामाथि लगातार हमला गरिरहेका छन् र त्यसको एउटा कडी त्यहाँको अस्पतालमाथिको हमला हो भनेर निष्कर्ष निकाल्नका लागि पूरा आधार छ ।
हामीले पहिले नै यो स्पष्ट गरिसकेका छौँ कि हमासद्वारा इजरायलका निरपराध वा निशस्त्र जनतामाथि गरिएको आतङ्कवादी हमला गलत थियो र त्यसको हाम्रो पार्टीले निन्दा गरिसकेको छ तर त्यो कारणले गाजापट्टीमा इजरायलले जुन नरसंहार गरिरहेको छ, त्यसलाई कुनै पनि अवस्थामा सही भन्न सकिन्न । अहिले गाँजापट्टीमा भइरहेको युद्ध इतिहासमा प्यालिस्टाइनमाथि भएको बर्बर र अन्यायपूर्ण कारबाहीसित जोडिएको छ, जुन बेला लाखौँ प्यालिस्टाइनीलाई आफ्नो भूमिबाट जबरजस्ती हटाइएको थियो र उनीहरूलाई खाडीका विभिन्न देशमा आश्रयहीन तथा शरणार्थी भएर बस्न बाध्य गरिएको थियो । उनीहरूले आफ्नो भूमिमा पुन: फर्केर जानका लागि मुक्ति आन्दोलन चलाउँछन् भने त्यसलाई कुनै पनि अवस्थामा गलत भन्न सकिन्न । त्यसैले हामीले प्यालिस्टाइनका जनताले चलाइरहेको मुक्ति आन्दोलनलाई सधैँ दृढतापूर्वक समर्थन गर्दै आएको छौँ ।
आज इजराइलले सामान्यत: गाजापट्टीमाथि तथा विशेषत: सम्पूर्ण प्यालिस्टीयन जनतामाथि जुन हमला गरिरहेको छ, त्यसलाई हामीले गलत मान्दछौँ र विरोध गर्दछौँ । यो कुरा दिनको उज्यालो झै छर्लङ्ग छ कि गाँजापट्टी वा प्यालेस्टाइनी जनतामाथि इजराइलले गरेको हमलाका लागि इजरायलभन्दा बढी जिम्मेवार अमेरिकी साम्राज्यवाद नै छ । प्यालेस्टाइनी जनतामाथि इजरायलले गरेको हमला अमेरिकी साम्राज्यवादद्वारा संसारभरि गरिरहेको उत्पीडन तथा हमलाको एउटा अङ्ग हो । त्यसैले अमेरिका र सबै साम्राज्यवादी शक्तिका विरुद्ध सङ्घर्ष गरेर नै अमेरिकी साम्राज्यवादको त्यस प्रकारको विश्वव्यापी उत्पीडन र हमलालाई रोक्न सकिन्छ र रोक्नु पनि पर्दछ ।
यो स्वागतयोग्य कुरा हो कि प्यालेस्टाइनी जनतामाथि इजरायल र अमेरिकी साम्राज्यवादले गरिरहेको हमलाका विरुद्ध कैयौँ अरब राष्ट्र पनि उठ्न थालेका छन् र इजरायलको त्यो हमलाका विरुद्ध विश्वव्यापी रूपमा प्रदर्शन भइरहेका छन् तर हामीले यो स्पष्ट गर्न चाहान्छौँ कि प्यालिस्टाइनका जनतामाथि इजरायलद्वारा भइरहेको हमला खालि एउटा मुस्लिम प्रश्न मात्र होइन र यो साम्राज्यवादका विरुद्धको सङ्घर्षको विश्वव्यापी समस्या हो । त्यसैले प्यालेस्टाइनी जनतामाथि भइरहेको साम्राज्यवादी हमलाका विरुद्ध सम्पूर्ण साम्राज्यवाद विरोधी जनता उठ्नुपर्ने आजको ऐतिहासिक र अन्तराष्ट्रिय आवश्यकता भएको छ ।”
