काठमाडौँ । मिटरब्याजपीडित किसान र सामुदायिक शिक्षकको आन्दोलनको विषयमा तयार पारिएको चलचित्र ‘कौसीद’ २०८० असोज २६ गतेदेखि प्रदर्शनमा आएको छ ।
केही समयअगाडि काठमाडौँमा मिटरब्याजको समस्याबाट पीडित र सार्वजनिक विद्यालयका शिक्षकले जनजीविका र सामाजिक सुरक्षाको विषय जोडेर आन्दोलन गरे । यी दुई आन्दोलनको विषयलाई चलचित्रको पर्दामा देखाइएको हो ।
संस्कृत भाषामा ‘कौसीद’ को अर्थ बैङ्कबाट लिइएको ऋणसम्बन्धी हो । मधेसको मिथिलानगरी जनकपुरमा जन्मेर हुर्किनुभएका निर्देशक कुमार भाष्करले सिङ्गो नेपालको समस्यालाई चलचित्रको विषय बनाउनुभयो ।
केही पुस्तकलाई मैथलीमा अनुवाद र केही छोटा चलचित्रको निर्देशन गरिसक्नुभएका निर्देशक भाष्करको यो ठुलो पर्दाका लागि पहिलो काम हो ।
‘मैले शिक्षकको समस्यालाई भोग्ने शिक्षक भेटेको थिएँ । छोरालाई उच्च शिक्षा पढाउनुपर्यो† छोरीको विवाह गराइदिनुपर्यो; घर बनाउनुपर्यो; यो बेला सम्झिने भनेको बैङ्क हो तर यी सबमा एक इमानदार शिक्षक एक्लो हुन्छ; त्यहीँ भोगाइ पर्दामा छ’ निर्देशक भाष्करले भन्नुभयो– ‘यसलाई मैले दुई वर्षअगाडि नै लेखेर तयार गरेको थिएँ । अहिले यो समस्या सबैको आँखामा परेको छ । हामीले चलचित्रमार्फत आफ्नै समाजको मौलिक विषयलाई उठाउन खोजेका थियौँ ।’
चलचित्रले एउटा शिक्षकको कथा व्यक्त गरेको छ । इमानदार शिक्षकको भूमिकामा भोलाराज सापकोटा हुनुहुन्छ । उहाँको पत्नी ऋचा शर्मा र एक छोरा र एक छोरी छन् । छोरीको जन्मदिन मनाउने क्रममा घरबेटीले भाडाको विषय किचलो गरेपछि शिक्षक परिवारको जोडबलमा ऋण गरेर भए पनि घर बनाउन सफल हुन्छन् । पत्नी, छोराछोरीको रहर हुँदै गर्दा सालोले बैङ्कमा चिनजान भएकाले सस्तो ब्याजमा ऋण मिलाइदिने भनेपछि शिक्षक सहमत हुन्छन् ।
विद्यालयको तलबले घरघर्च टार्न नै धौ धौ हुन्छ । इमानदार भएकाले विद्यालयको विभिन्न निर्माणसम्बन्धी बोलपत्र, शिक्षक नियुक्तिका विषयमा उनले अनैतिक काम गर्दैनन् यद्यपि बैङ्कको ब्याज तिर्न नसक्दा उनको नाम नै पत्रिकामार्फत खराब ऋणीको रूपमा प्रकाशित हुन्छ । त्यसपछि ती इमान्दार शिक्षकले के गर्छन् ? भन्ने विषयवस्तु नै चलचित्रमा देखाइएको छ ।
‘यो कथाले आकर्षित गरेर मैले काम गरेको हुँ । यस्ता चलचित्र नेपालमा कमै बन्छन् र बनेकालाई एउटा कलाकारका हिसाबले हामीले हौसला दिनुपर्छ‘ अभिनेता सापकोटाले भन्नुभयो ।
चलचित्रमा रूपेश दाहाल, परीक्षितविक्रम राणा, सदीक्षा गौतम, निर्भिक भट्टराई, सागर भट्टराई, सन्दीप लोहनीलगायत कलाकारले समेत अभिनय गर्नुभएको छ ।
