काठमाडौं । सरकारले नेपाली सेनालाई उच्च सतर्क अवस्थामा रहन निर्देशन दिएको छ ।
पछिल्लो समय देशका विभिन्न भागमा धार्मिक तथा जातीय तनाव बढिरहेका बेला बुधबार सिंहरबारमा बसेको राष्ट्रिय सुरक्षा परिषद्को बैठकले सेनालाई जुनसुकै बेला परिचालन हुने गरी तयारी अवस्थामा रहन भनेको हो।
पछिल्लो केही सातायता सुनसरीको धरान, सर्लाहीको मलंगवा र बाँकेको नेपालगञ्जसहितका स्थानमा सुरक्षालाई चुनौती दिने गरी धार्मिक तनाव बढ्दै गएपछि सेनालाई यस्तो निर्देशन गरिएको हो।
नेपालगञ्जमा हिन्दु र मुस्लिम समुदायबीच धार्मिक तनाव बढेपछि कर्फ्युको अवस्था छ। त्यहाँको तनाव रोक्न मंगलबारदेखि नै नेपाली सेना, सशस्त्र प्रहरी र नेपाल प्रहरीसहितको टोली परिचालन गरिएको छ।
अझै पनि कर्फ्यु जारी राखिएको छ। देशका विभिन्न भागमा दुई समुदायबीच हिंसाको अवस्था उत्पन्न हुन थालेपछि सुरक्षा समितिको बैठक बसेको थियो।
‘तनावको भित्री कारण हुनसक्छ’
सरकारले बाँकेको नेपालगञ्जमा तीन दिनदेखि देखिएको दुई समुदायबीचको धार्मिक तनावमा भित्री कारण हुन सक्ने निष्कर्ष निकालेको छ। बुधबार बसेको राष्ट्रिय सुरक्षा परिषद्को बैठकले यस्तो निष्कर्ष निकालेको हो।
बैठकले देशको पछिल्लो सुरक्षा अवस्था र चुनौतीबारे लामो छलफल गर्दै नेपालगञ्जको धार्मिक तनावको कारण अर्कै हुन सक्ने जनाएको हो।
नेपालगञ्जमा केही दिनअघि फेसबुकबाट लेखिएको एउटा स्टाटसका कारण तनाव भएको बताइएको थियो।
असोज ११ गते मुस्लिम समुदाय मोहम्मद डेमा व्यस्त रहेका बेला नरैनापुरका एक युवाले इस्लाम धर्मका संस्थापक पैगम्बर मोहम्मदको नाम जोडेर फेसबुकमा आपत्तिजनक कुरा लेखेका थिए।
जार्बुद यादव नामको फेसबुक आइडीबाट धार्मिक निन्दासहित उक्त पोस्ट लेखिएपछि मुस्लिम समुदाय आक्रोशित भएको थियो।
उक्त टिप्पणीबाटै तनाव चुलिएर यही मंगलबार नेपालगञ्जमा दुई समुदायबीच झडपको अवस्था आएको थियो। त्यसपछि त्यहाँ दुई दिनदेखि कर्फ्यु छ।
तर यता सुरक्षा परिषद्ले भने उक्त फेसबुक स्टाटसबाट मात्रै तनाव नफैलिएको निष्कर्ष निकालेको हो। त्यही निष्कर्षपछि सुरक्षा परिषद्ले नेपाली सेनालाई उच्च सतर्क अवस्थामा रहन भनेको हो।
सुरक्षा परिषद्को बैठकमा प्रधानमन्त्री पुष्पकमल दाहाल प्रचण्ड, उपप्रधान तथा रक्षामन्त्री पूर्णबहादुर खड्का, अर्थमन्त्री डा. प्रकाशशरण महत, परराष्ट्रमन्त्री एनपी साउद, प्रधानसेनापति प्रभुराम शर्मा र राष्ट्रिय सुरक्षा सल्लाहकार शंकरदास वैरागी सहभागी थिए।
