काठमाडौँ । संविधानसभा अध्यक्ष, नेकपा (एमाले) का उपाध्यक्ष तथा सांसद सुवास नेम्वाङको राजकीय सम्मानका साथ अन्त्येष्टि गरिएको छ ।
२०८० भदौ २८ गते बिहीबार पशुपति आर्यघाटमा उहाँको दाहसंस्कार गरिएको हो ।
चितामा नेम्वाङको पार्थिव शरीर राखेपछि सुरुमा परिवारका सदस्यले अन्तिम श्रद्धाञ्जली अर्पण गरेका थिए । त्यसपछि नेकपा (एमाले) का अध्यक्ष केपी शर्मा ओलीले पार्टीको झन्डा ओढाएपछि प्रधानमन्त्री पुष्पकमल दाहाल प्रचण्डले राष्ट्रिय झण्डा ओढाएका थिए । त्यसपछि राष्ट्रिय जनमोर्चाका अध्यक्ष तथा सांसद चित्रबहादुर केसीसहित अन्य विशिष्ट व्यक्ति, र सर्वसाधारणले पुष्पगुच्छा चढाएर श्रद्धा व्यक्त गरेका थिए ।
नेम्वाङलाई पशुपति आर्यघाटमा छोराहरू मिङसो र सुहाङ नेम्वाङले दागबत्ती दिएका थिए । त्यसलगत्तै नेपाली सेनाको टोलीले शोक धुन बजाएको थियो ।
नेम्वाङको भदौ २६ गते मङ्गलबार निधन भएको थियो । बालुवाटारस्थित निवासमै बेहोस भएका उहाँलाई उपचारका लागि त्रिवि शिक्षण अस्पताल पुर्याउँदा चिकित्सकले मृत घोषणा गरेका थिए । सोही दिन बसेको मन्त्रिपरिषद् बैठकले राजकीय सम्मानका साथ अन्त्येष्टि गर्ने र अन्त्येष्टिको दिन देशभर सार्वजनिक बिदा दिने निर्णय गरेको थियो ।
एक दिन एमाले केन्द्रीय कार्यालय च्यासलमा र अर्को एक दिन बालुवाटारस्थित निवासमा श्रद्धाञ्जलीका लागि राखेपछि बिहीबार नेम्वाङको पार्थिव शरीर पशुपति आर्यघाट पुर्याइएको थियो ।
बालुवाटारस्थित निवासबाट मुन्धुम संस्कृति अनुसार प्रक्रिया पूरा गरेपछि नेम्वाङको शवयात्रा सुरु भएको थियो । शवयात्रा बालुवाटार, त्रिवि शिक्षण अस्पताल, महाराजगञ्ज, चाबहिल हुँदै पशुपति आर्यघाट पुगेको थियो ।
शवयात्रामा नेपाली सेनाको ब्यान्ड टोली संलग्न थियो । एमाले पार्टीका कार्यकर्ता, शुभेच्छुक, आफन्त र सर्वसाधारण पनि शवयात्रामा सहभागी थिए । नेम्वाङको पार्थिव शरीरलाई आर्यघाट पुर्याएर फूलले सजाइएको चितामा राखिएको थियो ।
