काठमाडौं । काठमाडौंमा ‘ज्ञानशाला अनुसन्धान केन्द्र’ नामक अनौपचारिक शिक्षालय खुलेको छ । राजधानीको नयाँबजारस्थित खुशीबु उत्तम चोकमा आइतबार सो केन्द्रको उद्घाटन गरिएको छ ।
लामो समयदेखि शिक्षण पेशामा आवद्ध भोला ढकाल, समीर सिंहलगायतका बौद्धिक व्यक्तित्वहरुले सो केन्द्र सञ्चालनमा ल्याउनुभएको हो ।
केन्द्रले समाज, राजनीति, दर्शन आदिसँग जोडिएका हरेक पक्षहरूको अध्ययन तथा अनुसन्धान गर्ने संस्थाका अध्यक्ष भोला ढकालले जानकारी दिनुभयो ।
प्राज्ञिक क्षेत्रमा महत्त्वपूर्ण योगदान गरेका व्यक्तित्वहरूलाई एकै ठाउँमा जमघट गराएर विविध विषयमा प्रशिक्षण दिइने उहाँले बताउनुभयो ।
अनुसन्धानमूलक विषयहरूमा केन्द्रित हुनुका साथै विभिन्न भाषा कक्षाहरू, शिक्षक तथा मन्टेश्वरी तालिम, सेयर तथा लेखा तालिम, नेतृत्व विकास कार्यशाला, कविता तथा कथा लेखन कार्यशाला, बाल साहित्य लेखन, आधारभूत आमसञ्चार तालिम, योगा तथा नृत्य अभ्यास जस्ता विषयहरूमा पनि क्रियाशील हुने अध्यक्ष ढकालको भनाई छ ।
संस्थाका सञ्चालक समीर सिंहले ज्ञानशालाले कुनै पार्टी वा संगठन विशेष भन्दा पनि सबै पक्षलाई समेटेर अघि बढ्ने बताउनुभयो ।
‘ज्ञानशाला विभिन्न विषयहरुमा अध्धयन अनुसन्धान गर्ने केन्द्र हो । जीवन र दर्शनसँग सम्बन्धित विज्ञलाई बोलाएर सिक्ने र सिकाउने यसको उदेश्य हो’ सिंहले युगदर्शनसँग भन्नुभयो, ‘हामी कुनै पार्टी वा समूह भन्दा पनि सबै पक्षलाई समेटेर कुनै पनि विषयमा ज्ञानको गहिराईसम्म पुग्ने प्रयत्न गर्ने छौँ ।’
आइतबार भएको ज्ञानशाला उद्घाटन समारोहमा सहभागी व्यक्तित्वहरुले सो केन्द्रको उदेश्यबारे जिज्ञासा राख्नुका साथै विभिन्न सुझावहरु पनि दिएका छन् ।
सहभागीले ज्ञानशालालाई कुनै निश्चित विषयको ‘ब्रान्डिङ’ बनाउन, सैद्धान्तिकसँगै व्यवहारिक शिक्षा प्रदान गर्न तथा युवा जमातलाई स्वदेशभित्रै केही गर्न सकिन्छ भन्ने हौसला र ज्ञान प्रदान गर्न ज्ञानशालाले भूमिका खेल्नुपर्ने बताएका थिए ।
