कृष्ण केसी, भरतपुर ।
चितवनमा अखिल नेपाल महिला सङ्घको आयोजनामा प्रगतिशील तिजी कार्यक्रम सम्पन्न भएको छ ।
केन्द्रीय अध्यक्ष मीना पुनको प्रमुख आतिथ्यमा २०८० भदौ २३ शनिबारका दिन भरतपुर–१२ प्रभातचोकमा सो कार्यक्रम सम्पन्न भएको हो ।
प्रमुख अतिथि केन्द्रीय अध्यक्ष पुनले कार्यक्रम उद्घाटनको साथै तिज पर्व र यसको परम्परागत विश्वास एवम् प्रगतिशील महिलाहरूले गर्ने तिजको प्रगतिशील उपयोग, त्यसको उद्देश्यलगायतका पक्षमा प्रकाश पार्नुभएको थियो ।
कार्यक्रममा विशिष्ट अतिथिमा राष्ट्रिय जनमोर्चा केन्द्रीय सदस्य डम्बर पुरी हुनुहुन्थ्यो ।
सो अवसरमा राजमो जिल्ला अध्यक्ष अमर क्षेत्री, अखिल नेपाल किसान महासङ्घ (अप्फा) का केन्द्रीय सदस्य तथा जिल्ला अध्यक्ष विष्णु पौडेल, अखिल नेपाल महिला सङ्घ (क्रान्तिकारी) चितवनकी अध्यक्ष विमला विकको पनि आतिथ्य रहेको थियो ।
महिला सङ्घ चितवनकी अध्यक्ष बालकुमारी आचार्यको अध्यक्षतामा सम्पन्न सो कार्यक्रमको सञ्चालन सचिव कुमारी शर्माले तथा स्वागत उपाध्यक्ष चन्द्रकला क्षेत्रीले गर्नुभएको थियो ।
रक्तिम सांस्कृतिक अभियानका कलाकर्मीहरू मोहराज चालिसे, देवी शर्मा, पुष्पा थापा, कुमारी थापालगायतले तिजका विभिन्न गीत एवम् नाच प्रस्तुत गर्नुभएको उक्त कार्यक्रममा युवक, विद्यार्थी, ट्रेड युनियन, किसान, शिक्षक, पत्रकार आदिको उपस्थिति रहेको थियो ।
