काठमाडौँ । अखिल (छैठौं) त्रिभुवन विश्वविद्यालय समितिले त्रिवि सेवा आयोगको व्यवस्थापनमा सुधारको माग राख्दै ज्ञापनपत्र बुझाएको छ ।
आयोगका अध्यक्ष प्राडा घनश्याम भट्टराईलाई बधाई तथा सफल कार्यकालको शुभकामना दिँदै २०८० भदौ १५ गते शुक्रबार अखिल (छैठौं) ले ज्ञापन बुझाएको हो ।
ज्ञापनपत्र बुझाउनका लागि केन्द्रीय अध्यक्ष देवेन्द्र कुँवर, केन्द्रीय सचिव पुरण पोख्रेल, सचिवालय सदस्य विवेक जिसी, केन्द्रीय सदस्य पूजा बेल्बासे, पूर्व सचिवालय सदस्य तिलक गाहा, विश्वविद्यालय समितिका अध्यक्ष सङ्गम थापा र पूर्व राष्ट्रिय परिषद सदस्य मनिस कँडेललगायतको प्रतिनिधिमण्डल कीर्तिपुर पुगेको थियो ।
विश्वविद्यालय समितिका अध्यक्ष सङ्गम थापाको हस्ताक्षरमा बुझाइएको उक्त ज्ञापनमा रिक्त रहेका प्राध्यापक तथा कर्मचारीको खुला प्रतिष्पर्धाबाट पदपूर्ति गरिनुपर्ने, विज्ञापन नं. १८ को नतिजा तत्कालै प्रकाशित गर्नुपर्ने, अन्तर्वार्ता दिन वञ्चित भएकालाई तत्कालै अन्तर्वार्ता दिन लगाउनुपर्ने, करार सेवाका प्राध्यापक तथा कर्मचारीको पदपूर्ति खुला प्रतिष्पर्धाबाट गर्नुपर्ने र हाल त्रिवि शिक्षा आयोगले प्रयोग गरेको भवन छात्रावासको भएकाले सोहीअनुसार उपयोग गरिनुपर्ने माग राखिएको छ ।
यस्तो छ, ज्ञापनपत्रको पूर्ण पाठ :
“हाम्रो सङ्गठन अखिल (छैठौं) निरन्तर राष्ट्रियता, जनतन्त्र, जनजीविकाको सवालमा र विद्यार्थी हकहितको पक्षमा लड्दै आइरहेको छ । विद्यार्थीका समस्याहरू सरोकारवाला पक्षसमक्ष राख्ने र समस्या समाधानका लागि आवश्यक पहल गर्न नेतृत्वदायी भूमिका निर्वाहसमेत गर्ने गरेको छ । त्रिभुवन विश्वविद्यालय र त्यस मातहतका आङ्गिक क्याम्पसको वातावरणलाई शैक्षिक तथा प्राज्ञिक बनाउन महत्त्वपूर्ण भूमिका निर्वाह गर्दै विश्वविद्यालय तथा क्याम्पसमा पनि आफ्ना गतिविधि सञ्चालन गर्दै आइरहेको छ ।
लामो समयसम्म सेवा आयोग अध्यक्षविहीन रहँदा विश्वविद्यालयमा रिक्त रहेका प्रध्यापक तथा कर्मचारीको पदपूर्ति, वृत्तिविकास बढुवा सिफारिस रोकिएका कारण विश्वविद्यालय र मातहतका क्याम्पसको शैक्षिक तथा प्रशासनिक सेवा चुस्तदुरुस्त र पारदर्शी हुन सकेको छैन । त्रिभुवन विश्वविद्यालयको गरिमालाई जोगाउनका लागि प्राध्यापक तथा कर्मचारीको पदपूर्ति, वृत्तिविकास तथा बढुवा प्रक्रिया खुला प्रतिष्पर्धाबाट पदपूर्ति गर्नका लागि अनुरोध गर्दै निम्न मागसहित यो ज्ञापनपत्र पेस गर्दछौँ :
१. रिक्त रहेका उपप्राध्यापक तथा कर्मचारीको खुला प्रतिष्पर्धाबाट पदपूर्ति गर्न तत्काल विज्ञापन खोल्न माग गर्दछौँ ।
२. सेवा आयोगको विज्ञापन नं. १८ को अदालतबाट फैसला भई सफाइ पाइसकेका पदको नतिजा तत्काल प्रकाशित गरियोस् ।
३. परीक्षा सम्पन्न भई अन्तर्वार्ता दिनबाट वञ्चित भएकाहरूको अन्तर्वार्ता प्रक्रिया तत्काल अगाडि बढाइयोस् ।
४. करार सेवामा कार्यरत प्राध्यापक तथा कर्मचारीको आन्तरिक प्रतिष्पर्धाबाट स्थायी गर्ने प्रक्रिया तत्काल रोकी खुला प्रतिष्पर्धाबाट पदपूर्ति गरियोस् ।
५. हाल त्रिवि सेवा आयोगले प्रयोग गर्दै आएको भवन छात्रावास प्रयोजनको लागि निर्माण गरिएको कुरा सर्वविदितै छ । यस सम्बन्धमा त्रिवि जिल्ला समितिले उक्त भवन खाली गराउन पटक पटक ध्यानाकर्षण गरेता पनि ढिलासुस्ती गरेका कारण तत्काल खाली गरी छात्रावास प्रयोजनको लागि सहज वतावरण सिर्जना गर्न अनुरोध गर्दछौँ ।”
