काठमाडौं । नेपालको पुरानो बैंक नेपाल बैंक लिमिटेडको नाफा अघिल्लो वर्षको तुलनामा १८ प्रतिशत घटेको छ । गत वर्षको पुससँग तुलना गर्दा नाफा १८ प्रतिशतले घटेको बैंकको तथ्यांकले देखाएको छ ।
तर पछिल्लो तीन महिनाको मात्र हिसाब गर्ने हो भने नाफा ३ प्रतिशतले बढेको पाइएको छ । बैंकले गत पुससम्म रु १ अर्ब ३५ करोड नाफा गरेको छ । विसं २०७५ को पुस मसान्तसम्म रु १ अर्ब ६६ करोड नाफा गरेको थियो ।
बैंकको निक्षेप रु २ अर्ब ३२ करोडले बढेर रु १ खर्ब १७ अर्ब पुगेको छ । ऋण विस्तारमा आक्रामक देखिएको बैंकले चालु आवको ६ महिनामा रु ६ अर्ब ४ करोड ऋण विस्तार गरेको छ । बैंकले कुल रु ९८ अर्ब ४५ करोड ऋण प्रवाह गरेको छ । बैंकले खराब ऋणको मात्रा २.७४ प्रतिशतबाट घटाएर २.६६ प्रतिशतमा झारेको छ । बैंकले गत पुस २५ गते वार्षिक साधारणसभा सम्पन्न गरी २३ वर्षपछि २५ प्रतिशत लाभांश दिएको थियो ।
बैंकमा नेपाल सरकारको ५१ प्रतिशत र आम नागरिकको ४९ प्रतिशत शेयर स्वामित्व रहेको छ । सशस्त्र द्वन्द्व अघि नेपाल बैंक देशभर नै पुगेको थियो । शाखा सङ्ख्या मात्र २१४ थिए । त्यो घट्दै ९६ मा सिमित भयो । शान्ति प्रक्रियापछि शाखा सङ्ख्या बढ्दै पुनः हाल १७७ मा पुगेको छ । पहिलेकै अवस्थामा पुग्न अझै ३७ शाखा विस्तार गर्न बाँकी छ । चालु आवको अन्त्यसम्म २०० शाखा पु¥याउने योजना रहेको बैंकले जनाएको छ ।
