काठमाडौँ । लोक गायक तथा सर्जक रेशम थापा उच्च रक्तचापका कारण गम्भीर बिरामी परेका छन् । शनिबार रक्तचाप बढेर जोरपाटीस्थित आफ्नै निवासमा ढलेका उनी भएपछि आइतबारदेखि अन्नपूर्ण न्युरो अस्पतालको आइसियुमा उपचाररत छन् ।
सङ्गीतकर्मी सङ्घका कार्यवाहक अध्यक्ष तथा गायक प्रकाश कटुवालका अनुसार रक्तचापका कारण ढलेका उनको शरीरको आधा भागमा प्यारालाइसिस भएको छ भने मस्तिष्कको नशामा असर परेकाले शल्यक्रिया गर्नुपर्ने उपचारमा संलग्न चिकित्सकले बताएका छन् ।
उपचारका लागि ठुलो धनराशि खर्च हुने र थापाको आर्थिक अवस्था कमजोर भएको उल्लेख गर्दै सङ्घले रेशम थापा बचाउ अभियान सञ्चालन गरेर उनको उपचारमा सहयोगको अपिल गरेको छ । थापाको उपचारका लागि गायक गायिकालगायत केही व्यक्तिबाट सहयोग सङ्कलन भइरहेको जनाइएको छ।
सङ्घका संस्थापक तथा पूर्व अध्यक्षसमेत रहेका थापाले “रुमालै छ चिनो, मेरो फोटो किन पो जलायौ, सरिता, मेरै भन्थेऊ अर्कैलाई सुहायौ, छुट्नै परे बीस पिउला नि, मेरो झल्को मेटाउने को पायौ, नउने आमा मखमली, पराई घरमा, फुल्यो जमुना, बेसी टारी खेत” जस्ता सयौँ गीत गाएका छन् । उनले पछिल्लो समय “म बाचूँ कसरी” बोलको गीत ल्याएका थिए ।
