खिमराज चालिसे, चन्डिगढ (भारत) ।
राष्ट्रिय जनमोर्चाकी केन्द्रीय सदस्य सरिता जिसीले महिलामुक्ति आन्दोलनलाई वर्गीय आन्दोलनसँग जोड्नुपर्ने आवश्यकतामा जोड दिनुभएको छ ।
मूल प्रवाह अखिल भारत नेपाली एकता समाज सुदूरपश्चिमोत्तर क्षेत्रीय महिला विभागको आयोजनामा अगस्त १५, २०२३ का दिन चन्डिगढमा आयोजित प्रशिक्षण कार्यक्रमलाई सम्बोधन गर्दै जिसीले यस्तो दाबी गर्नुभएको हो ।
‘सम्पत्तिको अधिकारबाट वञ्चित हुनु नै महिलालाई कमजोर बनाउने आधार हो’ नेतृ जिसीले अगाडि थप्नुभयो– ‘परिवारमा विखण्डन र विवादबाट बचाउने तर्क दिएर महिला अधिकारको हनन् गरिरहने यो व्यवस्थासँग महिलाहरूको सङ्घर्ष चलिरहने छ ।’
उहाँले मूल प्रवाह अखिल भारत एकता समाजले भारतमा नेपालीहरूको अनुशासन, जीवनशैली, बोलचाल र व्यवहारमा परिवर्तन गर्दै घर घरमा पुगेर उनीहरूको हकहितको रक्षा गर्ने भएका कारण यो सङ्गठन अभिभावक बनेको धारणा पनि व्यक्त गर्नुभयो ।
मूल प्रवाहका केन्द्रीय सदस्य दिनेश खडकाले शुभकामना दिनुभएको उक्त कार्यक्रममा अर्का केन्द्रीय सदस्य तिलक पौड्याल, नेपाली समाचारका संयोजक तथा मूल प्रवाहका केन्द्रीय सदस्य खिमराज चालिसे, केन्द्रीय सल्लाहकार प्रेम आचार्य, महिला विभाग केन्द्रीय सदस्य शुष्मा खडका, केन्द्रीय परिषद् सदस्य मानबहादुर केसी, काजीमान राई र थम्मन थापा, रक्तिम केन्द्रीय विभागकी सदस्य बिनु नेपाली, मूल प्रवाह सुदूर पश्चिमोत्तर क्षेत्रीय सदस्य प्रेम रसाली, विद्यार्थी सङ्घका केन्द्रीय सदस्य विष्णु बेलबासेलगायतको आतिथ्य रहेको थियो ।
कार्यक्रम जुना चालिसेको सञ्चालनमा तथा माया आचार्यको अध्यक्षतामा सम्पन्न भएको हो ।
ज्ञातअज्ञात सहिदहरूप्रति एक मिनट मौनधारणपश्चात् उपस्थित सबैलाई सीमा खड्काले र कलाकारले स्वागत गर्नुभएको हो ।
