इन्द्रमणि पाण्डे, बागलुङबजार ।
रक्तिम सांस्कृतिक अभियान ढोरपाटन नगर समितिले तयार पारेको “प्राणभन्दा प्यारो लाग्छ नेपालको माटो” र “बढ्दै जाऊ बढ्दैै जाऊ शिखर धेरै माथि छ” शीर्षक दुई गीतको विमोचन गरिएको छ ।
राष्ट्रिय जनमोर्चाका केन्द्रीय सदस्य गौरिश्वर पाण्डेले २०८० साउन २६ गते शुक्रवार बागलुङको बुर्तिबाङबजारमा आयोजित एक कार्यक्रममाझ ती गीत विमोचन गर्नुभएको हो ।
सो अवसरमा प्रमुख अतिथिको रूपमा बोल्दै राजमो केन्द्रीय सदस्य पाण्डेले पाश्चात्य संस्कृतिको प्रभावले थिचोमिचो पारेको नेपाली समाजमा प्रगतिशील साहित्य तथा सङ्गीतलाई अपनाउनु ठुलो चुनौती रहेको बताउनुभयो ।
उहाले यस सकारात्मक कामका लागि रक्तिम सांस्कृतिक अभियान ढोरपाटन नगर समितिलाई विशेष धन्यवाद दिनुभएको थियो ।
कार्यक्रममा नेकपा (माओवादी केन्द्र) का वैकल्पिक केन्द्रीय सदस्य निलबहादुर पुन, जनता समाजवादी पार्टीका गण्डकी प्रदेश सदस्य गङ्गाबहादुर घर्ती, नेकपा (एमाले) ढोरपाटन नगर उपाध्यक्ष ज्ञानप्रसाद कँडेल, न्यू मोर्डन एकेडेमी कम्पनीका सञ्चालक समिति अध्यक्ष उत्तम महतलगायतले शुभकामना मन्तव्य राख्नुभएको थियो ।
गीतकार तथा जनगायक सहबिन अर्गेजाले विमोचन गरिएको गीतको बारेमा स्पष्ट पार्दै विभिन्न माध्यमबाट सहयोग गर्ने सबैलाई धन्यवाद दिनुभएको थियो ।
रक्तिमका केन्द्रीय सचिव तथा बागलुङका अध्यक्ष सहविन अर्गेजाको स्वरमा रहेको ती दुवै गीतमा शब्द दानबहादुर थापाको र सङ्गीत सौगात सायरको रहेको छ ।
बुर्तिबाङबजारको स्नेहा होटलमा आयोजना गरिएको विमोचन समारोहमा राजनीतक दल, व्यापारी, बुद्धिजीवी, पत्रकार, विभिन्न सङ्घसंस्थाका प्रमुखसहित स्थानीयवासीको उपस्थिति रहेको थियो ।
रक्तिम ढोरपाटन नामक युटुब च्यानलमा रहेको गीतलाई ढोरपाटन आसपासमा छायाङ्कन गरिएको छ । उक्त गीतले नेपाली राष्ट्रियता तथा स्थानिय संस्कृतिप्रति सकरात्मक सन्देश प्रवाह गर्न खोजेको स्थानीयको बुझाइ रहेको बताइएको छ ।
दुई गीतमध्ये “प्राणभन्दा प्यारो छ” गीत युट्युबमा राखिसकिएको छ भने अर्को गीत “बढ्दै जाऊ” केही समयपछि युट्युवमा राखिने रक्तिम सांस्कृतिक अभियान ढोरपाटनले जानाकारी गराएको छ ।
