काठमाडौँ । देशको केन्द्रीय शैक्षिक संस्थान त्रिभुवन विश्वविद्यालयले पर्यटन विकासको प्रश्नपत्रमा अधिकांश प्रश्न भारतको इतिहासबारे सोधिएपछि अखिल (छैठौं) ले त्यसको विरोध गरेको छ ।

अध्यक्ष देवेन्द्र कुँवरको हस्ताक्षरमा २०८० साउन ९ गते बिहीबार प्रेसवक्तव्य जारी गर्दै यसबारे विरोध व्यक्त गरिउको हो ।

साउन ८ गते त्रिभुवन विश्वविद्यालय बिए (चार बर्से) तेस्रो वर्षको मानविकी तथा सामाजिकशास्त्र सङ्कायको परीक्षामा यस खालको लापरबाही देखिएपछि युनियनले यस घटनाका दोषीलाई कारबाहीको दायरामा ल्याउन माग गरिएको छ ।

त्रिविको गरिमालाई कायम गर्न यस खालका लापरबाहीबारे अविलम्ब कारबाही गर्नुपर्ने माग अखिल (छैठौं) ले गरेको छ ।

यस्तो छ, प्रेसवक्तव्यको पूर्ण पाठ :

“साउन ८ गते त्रिभुवन विश्वविद्यालय बिए (चार बर्से) तेस्रो वर्षको मानविकी तथा सामाजिकशास्त्र सङ्कायको परीक्षामा History-410, Elective-2 Introduction to tourism development विषयको प्रश्नपत्र पाठ्यक्रम बाहिरको प्रश्नपत्र वितरण गरिएकोे घटनाप्रति अखिल (छैठौं) को गम्भीर ध्यानाकर्षण भएको छ । उक्त घटनामा संग्लन दोषी प्रध्यापक कर्मचारीलाई कारबाहीको दायरामा ल्याउनसमेत माग गर्दछौँ ।

देशको सबैभन्दा ठुलो तथा पुरानो विश्वविद्यालय त्रिभुवन विश्वविद्यालय हो तर त्रिभुवन विश्वविद्यालयमा विभिन्न समयमा विभिन्न प्रकारका घटना घट्ने गरेका छन् । विश्वविद्यालयका गलत गतिविधिले विश्वविद्यालयप्रति आम रूपमा आकर्षण घट्दै गइरहेको छ । विश्वविद्यालयको विभिन्न गतिविधि, क्रियाकलाप, परीक्षा प्रणाली र रिजल्ट प्रकाशन जस्ता विषयमामाथि बेला बेलामा प्रश्नहरू उठ्ने गरेको सन्दर्भमा यस्ता घटना हुनुले विश्वविद्यालयको विश्वसनीयता माथि नै थप प्रश्नचिह्न खडा भएको छ । विश्वविद्यालयका यस प्रकारका गलत क्रियाकलापलाई सच्याई र विश्वविद्यालयको गरिमालाई उचो राख्न सरोकारवाला पक्षसँग अनुरोध गर्दछौँ ।”