खुम रायमाझी, कुवेत ।
कुवेतमा बस्दै आएका बुटवल उपमहानरपालिका–१० रुपन्देहीका सुशान्त अर्यालको मृत्यु भएको छ । उनी लामो समयदेखि अवैधानिक रूपमा कुवेतमा बसोबास गर्दै आएका थिए ।
पछिल्लो समयमा स्वास्थ्य समस्या आएपछि उनले विभिन्न अस्पतालमा उपचार गराइरहेका थिए । उनको रोग गम्भीर देखिएको र कुवेतमा उपचार गराउन ठुलो खर्च लाग्ने डाक्टरले सल्लाह दिएपछि नेपाल फर्किन सहयोग गरिदिन विभिन्न सङ्घसंस्थालाई हारगुहार गरे पनि कतैबाट सुनुवाइ नभएको गुनासो लिएर कुवेत नेपाली एकता समाजमा आएका थिए ।
कुवेतमा अवैधानिक भएर बसेको भए पनि उनको स्वास्थ्य अवस्था रिपोर्ट हेर्दा गम्भीर भएको पाइएको थियो । नेपाली नागरिकलाई उद्धार गर्नु सबैको दायित्व भएको भन्दै कुवेत नेपाली एकता समाजका महासचिव खुम रायामाझीले कुवेतस्थित नेपाली राजदूतावासका प्रथम सचिव प्रेमराज गौतमसमक्ष विशेष अनुरोध गरेपछि राजदूतावासबाट गर्नुपर्ने सम्पूर्ण प्रकिया पूरा गरिएको थियो ।
कुवेतको कानुनअनुसार यस्ता मामिलामा पीडितलाई डिटेन्सन सेन्टरमा राख्नुपर्ने हुन्छ तर बिरामीको स्वास्थ्य अवस्था हेर्दा डिटेन्सन सेन्टरले लिन मानेको थिएन । फेरि पनि राजदूतावासको विशेष पहलमा त्यहाँ छोटो समय राखेर नेपाल फर्किने व्यवस्था मिलाइएको थियो ।
यसरी प्रक्रिया पूरा गरेर विमानस्थलसम्म पुगे पनि स्वास्थ्यमा अझ गम्भीर समस्या देखा परेपछि उनलाई फिर्ता पठाएको थियो ।
त्यसपछि तुरुन्तै हसवियास्थित फर्बानिया हस्पिटलमा उपचारका लागि लगिएका अर्याल पुनस् तीन दिनको उपचारपछि नेपाल उड्न एयरपोर्ट पुगेका थिए । यसपटक पनि उनको स्वास्थ्य अवस्था नाजुक रहेको भन्दै एयरलाइन्सले पुनस् फिर्ता पठाएको थियो ।
त्यसको लगत्तै हस्पिटलमा उपचार गराइरहेका उनको शुक्रबार २१ जुलाई २०२३ का दिन उपचारकै क्रममा निधन भएको हो ।
उनको पहिलै बनाएको कागजातबाट शव नेपाल पठाउन सकिन्छ कि भनेर प्रयास गरिरहेको दूतावासले जनाएको छ ।
