स्याङजाबजार । कामको खोजीमा विदेश पुगेर फर्केका स्याङजाका कमल गन्धर्व अब आफ्नै जिल्लामा फर्केर मादल बनाउने पेसामा जम्न थालेका छन् ।
बुबाबाट मादल बनाउने सिप सिकेका कमलले अन्ततस् यसैलाई आम्दानीको मुख्य स्रोत बनाएका हुन् ।
पाल्पाको रामपुरका गन्धर्वले स्याङ्जाको पुतलीबजार–१० राङखोलामा “प्रेम मादल उद्योग” मार्फत मादल उत्पादन गरी बिक्री गर्दै आएका छन् ।
जागिरको खोजीमा विदेश पुगेका उनले त्यसलाई बिट मार्दै मादल बनाउने पेसालाई व्यावसायिक रूपमा अगाडि बढाउने योजनाका साथ सक्रिय छन् ।
‘बुबासँगै मादल बनाउन सिक्दै र बनाउँदै गर्दा कामको खोजीमा विदेश गएँ’ उनले भने– ‘पाँच वर्ष चार महिना विदेशी भूमिमा पसिना बगाएपछि स्वदेश फर्किएर आफ्नै व्यवसाय सुरु गरेको हो ।’
राङखोलामा आफ्नो छुट्टै मादल उद्योग सञ्चालन गरेका गन्धर्वलाई नयाँ मादल बनाउने, मर्मत गर्नेलगायतका काम गर्न अहिले भ्याइनभ्याइ छ । रु चार लाख लगानीमा व्यवसाय सुरु गर्नुभएका गन्धर्वले वार्षिक रु तीन लाखभन्दा बढी आम्दानी गरिरहेको बताए ।
नयाँ मादल बनाउनुका साथै पुराना मादल, मिर्दुङ्गा, नगरा, डमरु, खैँजडी, नेवारी बाजा मर्मतबाट उहाँले आम्दानी गरिरहेका छन् ।
‘अहिले नयाँ बाजाका सेट तथा बाजाका सेट बनाउन र मर्मत गर्न भ्याइनभ्याइ छ’ उनले भने– ‘यहाँ उत्पादन भएका मादल तथा बाजाका सेटहरू स्याङजा, वालिङ, गल्याङ, पाल्पाको रामपुर, पोखरालगायतका ठाउँमा बिक्री हुने गरेको छ ।
मादल बनाउनका लागि रातो उत्तिसको काठ प्रयोग हुन्छ । काठ धादिङबाट आउने गरेको छ भने छाला भारतबाट ल्याउने उनले बताए । मादलको आकारअनुसार रु एक हजार आठ सयदेखि रु दुई हजार पाँच सयसम्ममा बिक्री हुन्छ । मागअनुसार काम गर्न कामदारको प्रयोग गर्दै आउनुभएको छ ।
‘विदेशी भूमिमा बगाएको पसिना स्वदेशी भूमिमा बगाउन पाउँदा खुसी लागेको छ’ उहाँले भन्नुभयो– ‘विदेशको बसाइ छोट्याएर फर्केपछि आफ्नै ठाउँमा सुरु गरेको पुख्र्यौली पेसाबाट म सन्तुष्ट छु ।’
