तौलिहवा । कपिलवस्तुको बाणगङ्गामा राष्ट्रिय जनमोर्चाको दोस्रो नगर सम्मेलन सम्पन्न भएको छ ।
जिल्ला अध्यक्ष दधिराम आचार्यको प्रमुख आतिथ्यमा २०८० साउन ६ गते शनिबार सम्मेलन सम्पन्न भएको हो ।
प्रमुख अतिथि आचार्यले ब्यानर पढेर सम्मेलनको उद्घाटन गर्नुभएको थियो । सो अवसरमा मन्तव्य राख्दै उहाँले राष्ट्रियताको रक्षा, गणतन्त्रको संस्थागत विकास, धर्मनिरपेक्षताको रक्षा तथा विभिन्न राष्ट्रघाती सन्धिसम्झौता र सङ्घीयताको खारेजी, एसिसीलगायत नागरिकता विधेयकको खारेजीबारे राजमो धारणा राख्नुभएको थियो ।
सो अवसरमा उहाँले प्रतिगमन विरोधी मोर्चाको रूपमा वर्तमान सरकारलाई समर्थन गरे पनि सरकारका गलत क्रियाकलापको विरुद्ध आवाज उठाउने राजमोको नीति रहेको उहाँले प्रष्ट पार्नुभयो ।
सम्मेलनमा रक्तिम सांस्कृतिक अभियानका केन्द्रीय सदस्य मनबहादुर नेपालीले पश्चिमी छाडा संस्कृतिले देश डुबेको अवस्थामा जनवादी प्रगतिवादी संस्कृतिको प्रचारप्रसारमा ध्यान दिन आग्रह गर्नुभयो ।
अखिल नेपाल बुद्धिजीवी सङ्घ कपिलवस्तुका संयोजक शशि सापकोटाले पनि सम्मेलनमा मन्तव्य राख्नुभएको थियो ।
सम्मेलनमा अखिल नेपाल किसान महासङ्घ (अप्फा) का उपाध्यक्ष शिव पौडेल र अखिल नेपाल शिक्षक सङ्घका केन्द्रीय सदस्य हिमलाल बेलबासेले शुभकामना दिनुभएको थियो ।
सम्मेलनले ११ पूर्ण र तीन सल्लाहकारसहित १४ सदस्यीीय नगर समिति गठन गरेका छ ।
समितिको अध्यक्षमा दलबहादुर कुँवर, उपाध्यक्षमा अम्बिका पौडेल, सचिवमा टेकपति सापकोटा र कोषाध्यक्षमा सिद्धि आचार्य रहनुभएको छ ।
त्यसैगरी सदस्यमा सावित्रा अधिकारी, टङ्क जिसी, युवराज आचार्य, शेरबहादुर खनाल, भूमिदत्त, देवा आचार्य र मधु पाण्डे रहनुभएको छ ।
एवम् प्रकारले सल्लाहकारमा डबलसिंह जिसी, ऋषिराम शर्मा र मुक्ति न्यौपाने निर्वाचित हुनुभएको छ ।
समितिलाई जिल्ला अध्यक्ष दधिराम आचार्यले टीका र फूल लगाएर सफल कार्यकालको शुभकामना तथा बधाई दिनुभएको थियो ।
समितिको तर्फबाट अध्यक्ष दलबहादुर कुँवरले प्रतिबद्धता व्यक्त गर्दै आफ्ना भनाइ राख्नुभएको थियो।
तयारी समितिका अध्यक्ष डबलसिंह जिसीको अध्यक्षतामा तथा नगर सचिव रामप्रसाद बेलबासेको सञ्चालनमा सम्मेलन सम्पन्न भएको थियो ।
महिलानेतृ अम्बिका पौडेलले स्वागत मन्तव्य राख्नुभएको थियो ।
