विराटनगर । लुटपाट गर्ने समूहको प्रतिकार गर्दा विराटनगरका नोबेल मेडिकल कलेजका कर्मचारी रोहित चौधरीको हत्या भएको छ ।
विराटनगर–५ का २८ वर्षीय चौधरीको एक समूहले सुनसरीको इटहरीधरान सडक खण्डको जङ्गगल क्षेत्रमा गोली हानी हत्या गरेको हो ।
गोली लागि गम्भीर घाइते भएका चौधरीको बीपी कोइराला स्वास्थ्य विज्ञान प्रतिष्ठान धरानमा उपचारका क्रममा शुक्रबार बेलुका नै मृत्यु भएको थियो ।
शुक्रबार बेलुका साथीसँग मुलघाट पुगेर फर्कंदै गर्दा सेउती पुल नजिकै तीन जनाको समूहले लुटपाट गर्न खोजको थियो । प्रतिकार गर्दा उनीमाथि गोली प्रहार भएको पाइएको सुनसरीका प्रहरी प्रवक्ता डिएसपी राजकुमार राईले बताए । हत्या गरी जङ्गगलतर्फ भागेको समूहको खोजी भइरहेको डिएसपी राईले बताए ।
प्रहरीका अनुसार घटनामा चौधरीकी केटी साथी सामान्य घाइते भएकी छन् । उनको बीपी कोइराला स्वास्थ्य विज्ञान प्रतिष्ठान धरानमा उपचार भइरहेको छ । ‘मुलघाटबाट फर्कने क्रममा सेउती पुल कटेपछि बाइक रोकेर पानी खान खोज्दा पानमारा तिरबाट आउने बाटोमा लुटपाटको प्रयास भएको रहेछ,’ प्रहरी स्रोतले भन्यो, ‘प्रतिकार गर्दा चौधरी माथि गोली प्रहार भएको देखिन्छ ।’
हत्यामा लागुऔषध प्रयोगकर्ताको संलग्नता भएको हुनसक्ने प्रहरीको आशंका छ । हत्यामा संलग्नहरुको खोजी भइरहेको छ । घटनापछि प्रहरीले शंकास्पदमाथि निगरानी बढाएको छ ।
