मेघराज रिष्मेली, टोकियो ।
जापानको यामागुची प्रिफेक्चरस्थित इवाकुनी सहरमा रहेको इमाजु नदीमा पौडी खेल्ने क्रममा डुबेर दुई जना नेपालीको मृत्यु भएको छ ।
जुलाइ, १८ २०२३ मङ्गलबार दिउँसो ४:३० बजे नदीमा पौडी खेल्ने क्रममा उनीहरूको मृत्यु भएको हो ।
खोलामा डुबेर मृत्यु हुनेमा कुक भिसामा कार्यरत बागलुङ जिल्ला काठेखोला गाउँपालिका वडा नम्बर ५ चिरपानीका २६ वर्षीय कृष्ण कँडेल र डिपेन्डेन्ट भिसामा कार्यरत पुरानो घर गुल्मीको ददल्का भई हाल चितवनको यज्ञपुरीका २२ वर्षीय प्रितम खरेल रहेको बिमल न्यौपानेले जानकारी दिए ।
न्यौपानेका अनुसार मृतकहरू उक्त खोलामा प्राय:जसो पौडी खेल्न जाने गरेको बताए ।
आठ वर्षअघि जापान आएका मृतक कँडेलकी पत्नी हाल जापानमा नै रहेकी छन । नेपालमा बुबाआमा र दुई दाजुभाइ रहेको बताइएको छ । मृतक कँडेल दाजुभाइमा माहिलो हुन् ।
मृतक खरेललाई दुईओटा रेस्टुरेन्टको जिम्मेवारी दिएर केही समयका लागि बाबुआमा केही दिनअघि मात्र नेपाल गएको बताइएको छ ।
अन्य दुईजना साथीहरूसहित खोलामा पौडी खेल्न गएका उनीहरूलाई खोलाले बगाएको थियो । बगाएका दुवैलाई कार्डियोपल्मोनरी अरेस्टको अवस्थामा अस्पताल लगिएको थियो । अस्पतालले उनीहरूलाई मृत भएको पुष्टि गरेको थियो ।
प्रहरी र दमकल विभागका अनुसार मङ्गलबार साँझ ४:३० बजे इवाकुनी सहरको इमाजु नदीमा पौडी खेलिरहेका एक नेपालीले ‘दुई जना बेपत्ता भएको’ भन्दै दमकललाई फोनमार्फत् खबर गरेपछि अग्निनियन्त्रकहरू घटनास्थलमा पुग्दा दुई जना नेपाली कार्डियोपल्मोनरी अरेस्ट अवस्थामा फेला परेका थिए ।
उद्धार टोलीका अनुसार एकजनालाई करिब ४:४५ बजे र अर्कोलाई साँझ ५:४० बजेतिर करिब २ देखि २.५ मिटर गहिराइमा उद्धार गरिएको थियो ।
इमाजु नदी जेआर इवाकुनी स्टेसनबाट करिब तीन किलोमिटर टाढाको सहरबाट बग्ने नदी हो ।
यस घटनाको सम्बन्धमा प्रहरी र दमकल विभागले थप अनुसन्धान गरिरहेको प्राप्त समाचारमा उल्लेख छ ।
