टुकबहादुर रामदाम, मस्कट ।
ओमानमा दुई सय दसौँ भानुजयन्ती मनाइएको छ ।
ओमानस्थित नेपाली दूतावास ओमान र अन्तर्राष्ट्रिय साहित्य समाज ओमान च्याप्टरको आयोजनामा जुलाई १४, २०२३ शुक्रबारको दिन नेपाली हाउसमा सो कार्यक्रम सम्पन्न भएको हो ।
प्रमुख अतिथि राजदूत डोरनाथ अर्याल रहनुभएको सो कार्यक्रमको अध्यक्षता साहित्य समाज ओमानका अध्यक्ष कृष्ण भुसालले र सञ्चालन सहचारी गोविन्द आचार्यले गर्नुभएको थियो ।
कार्यक्रममा पुन: श्रमस्वीकृति, सामाजिक सुरक्षा, टेलिमेडिसन सेवालगायतबारे प्रस्तुतीकरण गरिएको थियो ।
साहित्यिक कार्यक्रमको सञ्चालन चोलाकान्त भट्टराईले गर्नुभएको थियो ।
कार्यक्रममा कविता, गजल, साहित्यिक लेखरचना प्रस्तुत गरिएको थियो । सो अवसरमा प्रमुख अतिथि अर्यालले विभिन्न साहित्यकार तथा कलाकारलाई सम्मान गर्नुभएको थियो ।
कार्यक्रमको अवसरमा दूतावास र ओमानका कृयाशील सङ्घसंस्था बैठक पनि बसेको थियो । बैठकमा निर्यात, लगानी र पर्यटन प्रवद्र्धनबारे छलफल भएको प्राप्त समाचारमा उल्लेख छ ।
