काठमाडौं । ब्लड क्यान्सरबाट पीडित पत्रकार कमल पौडेलको उपचारका लागि नेपाली पत्रकारहरुको अन्तर्राष्ट्रिय सञ्जाल इञ्जाले आर्थिक सहयोग गरेको छ । इञ्जा स्थापना दिवसका अवसरमा आइतबार काठमाडौंमा आयोजित एक कार्यक्रममा पैडेलको उपचार सहयोगार्थ उनकी पत्नी अम्बिका पौडेललाई १४ लाख ११ हजार २ सय ४४ हजार रुपैयाँ सहयोग हस्तान्तरण गरिएको थियो । इञ्जा एसियाका अध्यक्ष टंक पन्तका अनुसार, यो रकम इञ्जा, डिसी नेपाल डटकम र इनेप्लिज डटकमको संयुक्त आव्हानमा संकलन गरिएको थियो ।
विराटनगरवाट सञ्चालित मकालु टेलिभिजनका समाचार प्रमुख कमल पौडेललाई ब्लड क्यान्सर देखिएपछि पौडेललाई काठमाडौंको मीनभवनस्थित सिभिल हस्पिटलमा भर्ना गरिएको छ ।
जनआस्था साप्ताहिकबाट पत्रकारिता सुरु गरेका पौडेल नेपाल समाचारपत्र दैनिकमा जिल्ला ब्युरो प्रमुख थिए । त्यसपछि उनले विराटनगर फर्केर टेलिभिजनमा काम गर्न थालेका हुन् ।
विराटनगरका क्याम्पसमा अध्यापन समेत गर्ने पौडेलको उपचारका लागि करिब ३० लाख रुपैयाँ खर्च हुने अस्पतालले जानकारी दिएको बताइएको छ ।
कार्यक्रममा १ हजार डलर राशीको इञ्जा स्रष्टा सम्मान नेपाली भाषाको झर्रोवादी आन्दोलनका अगुवा चुणामणी रेग्मी चुमरे लाई प्रदान गरिएको थियो । त्यसैगरी इञ्जा सामुदायिक पत्रकारिता पुरस्कार अछामकी पत्रकार मेनुका ढुंगाना र बाजुराका पत्रकार प्रकाश सिंहलाई संयुक्त रुपमा प्रदान गरिएको थियो । दुवैलाई जनही ५ सय डलर रुपैयाँ प्रदान गरिएको छ ।
कार्यक्रममा पत्रकारिता क्षेत्रमा लामो समय कार्यरत पत्रकारहरु नेपाल टेलिभिजनका कार्यकारी अध्यक्ष डाक्टर महेन्द्र विष्ट, राष्ट्रिय सूचना अयोगका पूर्व आयुक्त किरण पोख्रेल, न्यूज एजेन्सी नेपालकी अध्यक्ष कृष्णा पौडेल, समाचार पत्र दैनिकका सम्पादक कपिल काफ्ले, नेपाल प्रेस काउन्सिलकी सदस्य संगीता खड्कालाई इञ्जा सम्मानबाट सम्मानित गरिएको थियो ।
