पोखरा । संस्कृति पर्यटन तथा नागरिक उड्डयनमन्त्री सुदन किराँतीले नेपाल र चीनमाझको सम्बन्ध ऐतिहासिक रहेको बताउनुभएको छ ।
नेपाल पर्यटन बोर्ड, नेपालस्थित चिनियाँ दूतावास र पोखरा महानगरको आयोजनामा पोखरामा २०८० असार ८ गते शुक्रबारदेखि सुरु भएको नेपाल–चीन फ्रेन्डसिप ‘ड्रागन बोट रेस फेस्टिभल’ को उद्घाटन गर्दै उहाँले यस्तो बताउनुभयएको हो ।
पर्यटकीय नगरी पोखरामा आयोजित मैत्रीपूर्ण यस महोत्सवले दुई देशमाझको सांस्कृतिक र जनस्तरको सम्बन्धलाई समेत थप प्रगाढ बनाउने उहाँले विश्वास व्यक्त गर्नुभयो । उहाँले चीनसँग सम्बन्ध बलियो बनाउन फेस्टिभलले नयाँ सूत्रपात निर्माण गरेको भन्दै चिनियाँ नागरिकलाई नेपाल घुम्न आउन आग्रह गर्नुभयो ।
‘आदरणीय चिनियाँ नागरिकलाई म नेपाल घुम्न आउन निम्तो गर्न चाहन्छु । नेपालमा तपाईंहरूलाई स्वागत र सम्मान गर्न हामी आतुर छौँ’ मन्त्री किरातीले भन्नुभयो– ‘तपाईंंहरू नेपाल घुम्न आइदिनुहोस् ।’
मन्त्री किरातीले नेपाल एक चीन नीतिप्रति प्रतिबद्ध रहेकोसमेत स्पष्ट पार्नुभयो । इतिहासमा चीन र भारतको व्यापारिक नाकाको रूपमा स्थापित पोखरामा भव्य रूपमा महोत्सवमा ड्रागन बोट फेस्टिभल सम्पन्न हुन लागेको उहाँको भनाइ छ ।
नेपालका लागि चिनियाँ राजदूत छन् सोङले नेपाल र चीनमाझ लामो समयदेखि आर्थिक, सामाजिक तथा सांस्कृतिक सम्बन्ध रहेको बताउँदै ‘ड्रागन बोट रेस फेस्टिभल’ दुई देशमाझको आपसी सम्बन्ध एवम् जनस्तरको सम्बन्ध अझै बलियो बन्ने विश्वास व्यक्त गर्नुभयो ।
पोखरा महानगरपालिका प्रमुख धनराज आचार्यले ‘ड्रागन बोट रेस फेस्टिभल’ पोखरामा हुनुलाई आफूहरूले महŒवपूर्ण रूपमा लिएको बताउँदै यसले आगामी दिनमा पोखरामा चिनियाँ पयर्टकको आगमन बढ्ने विश्वास व्यक्त गर्नुभयो । उहाँले आगामी दिनमा समेत महोत्सवलाई निरन्तरता दिने जानकारी गराउनुभयो ।
नेपाल पर्यटन बोर्डका प्रमुख कार्यकारी अधिकृत धनन्जय रेग्मीले फेस्टिभलले पोखरा मात्र नभई समग्र नेपालकै पर्यटनमा टेवा पुग्ने बताउनुभयो ।
पोखरा पर्यटन परिषद्का अध्यक्ष पोमनारायण श्रेष्ठले नेपालमा पहिलोपटक आयोजना गरिएको यस प्रकारको कार्यक्रमले समग्रमा पर्यटनमा नयाँ आयाम थप्ने तथा पोखराको पर्यटनलाई थप चलायमान बनाउन सहयोग पुग्ने बताउनुभयो ।
दक्षिण एसियामा पहिलोपटक आयोजना गरिएको यो महोत्सवले नेपालको विश्वभर प्रबद्र्धन एवम् यसबाट भविष्यमा अझै बढी चिनियाँ पाहुना ल्याउन सहयोग पुग्ने उहाँको भनाइ छ ।
नेपाल र छिमेकी मित्रराष्ट्र चीनमाझको सांस्कृतिक तथा जनस्तरसम्मको सम्बन्ध सुमधुर बनाउने र पर्यटन प्रवद्र्धन गर्ने उद्देश्यले असार ८ र ९ गते दुई दिन बोटरेस तथा फेस्टिभलको आयोजना गरिएको हो ।
‘ड्रागन बोट रेस’ मा ड्रागन जस्तै देखिनेगरी बनाइएको डुङ्गाअगाडि बसेर एक जनाले ड्रम बजाउँछन् । सोही ड्रमको तालमा १० जनाले डुङ्गा खियाउँछन् र पुछारमा बस्ने एक जनाले डुङ्गाको दिशा मिलाउँछन् । (रासस)
