काठमाडौँ । नेपाल प्रज्ञा–प्रतिष्ठानका कुलपति भूपाल राईले नेपालमा प्रकाशित पुस्तक भारत लैजाने क्रममा सीमामा कडाइ हुने गुनासो आएको भन्दै समस्या सम्बोधनका लागि पहल गर्न नेपालस्थित भारतीय राजदूतावासको ध्यानाकर्षण गराउनुभएको छ ।
नेपाल–भारत साहित्य समारोहअन्तर्गत नेपाल–भारत पुस्तकालय काठमाडौँमा २०८० असार ४ गते सोमबार आयोजित “पुस्तक विमोचन एवम् परिचर्चा” कार्यक्रममा कुलपति राईले नेपाल र भारतमा प्रकाशित पुस्तकमा दुवै देशका पाठकको सहज पहुँच पुर्याउन सके पुस्तकको प्रभावकारिता अभिवृद्धि हुने विश्वास व्यक्त गर्नुभयो ।
सो अवसरमा उहाँले डा श्वेता दीप्तिद्वारा लिखित “साहित्य शोध समिधा” र डा रामदयाल राकेशद्वारा नेपालीबाट हिन्दी भाषामा अनुदित “समकालीन नेपाली कविताएँ” शीर्षकका दुई पुस्तक विमोचन गर्नुभएको थियो ।
दुवै पुस्तकहरू दुई देशबिच भाषिक, साहित्यिक, सांस्कृतिक एवम् कलाको आदानप्रदानमा कोसेढुङ्गा सावित हुने विश्वास व्यक्त गर्दै उहाँले दुई देशबिचको सम्बन्धलाई भाषा, साहित्य, कला र संस्कृतिमार्फत थप सुदृढ पार्न भारतीय दूतावासले महत्त्वपूर्ण भूमिका खेल्दै आएको भन्दै प्रशंसा गर्नुभयो । (रासस)
