खिमराज चालिसे चन्डिगढ (भारत) ।
चन्डिगढ एयरफोर्सको अति संवेदनशील एन एरियामा प्रवेश गरेको आरोपमा एयरफोर्स पुलिसद्वारा गिरफ्तार गरी पुलिस थाना सेक्टर–३१ मा राखिएका ५६ वर्षीय धनबहादुर खत्रीका आफन्तको खोजतलासमा मूल प्रवाह अखिल भारत नेपाली एकता समाज जुटेको छ ।
मूल प्रवाह केन्द्रीय सदस्य खिमराज चालिसेको नेतृत्वमा नगर सहसचिव थानेश्वर पाण्डेसमेत रहेको टिमले पीडित खत्रीलाई भेटे गरेको हो । उनीसँग नेपाल तथा भारतमा रहेका आफन्त कसैको पनि फोन नम्बर नभएको हुँदा निजको आफन्तको खोजीमा समस्या परेको हो ।
हिन्दी बोल्न नजान्ने खत्रीलाई पुलिसथानामा भेटी सोधपुछ गर्दा उनि केही दिनपहिला कारगिलबाट चार जना अन्य गाउँलेसँगै नेपाल जान हिँडेको बताएका छन् । उनीहरू हरिद्वारमा पुगेर त्यहाँ खाना खाएपछि आफू बेहोस भएको र त्यहीबाट आफना पैसा, सामान र साथीहरू हराएको गुनासो पनि गरेका छन । धनबहादुरले आफ्ना साथीहरू पैसा र सामानको खोजतलास गर्न हिडेकोसमेत बताएका छन ।
जाजरकोट जिल्लाको खालचौर गाउँपालिका वडा नम्बर ४ लाहा निवासी आसुराम खत्रीका छोरा बताउने धनबहादुर खत्रीको श्रीमती वृन्दा खत्री नेपालमा साइलो छोरा अमर र कान्छो छोरा वीरेन्द्र (जो अशक्त पनि छन्) सँग रहेको बताएका छन् भने जेठा छोरा कृष्ण खत्री भारतमा रहेको र माइलाछोरा मनबहादुर खत्रीसँग बसी आफूले कारगिलमा ठेकेदार गोपाल खत्रीसँग काम गर्ने गरेको बताएका छन् ।
निजको परिवारको बारेमा जानकारी मिलेमा भारतको चन्डिगढमा सबइस्पेक्टर सुरेन्द्र कुमार ००९१–९७८०५६६४४ वा खिमराज चालिसे ००९१–८९६८५०३०५० मा खबर गर्न अनुरोध गरिएको छ ।
