बागलुङ बजार । बागलुङमा शिक्षाको गुणस्तर बढाउन ‘अतिथि शिक्षक’ कार्यक्रम ल्याइएको छ ।

बागलुङ नगरपालिकाले शिक्षाको गुणस्तर बढाउने उद्देश्यले सो कार्यक्रम लागु गरेको हो ।

नगरपालिका प्रशासनले विद्यालयबिच शिक्षण पद्धति र सिकाइको अनुभव आदनप्रदान गर्ने उद्देश्यले अतिथि शिक्षक कार्यक्रम ल्याइएको दाबी गरेको छ ।

कार्यक्रमअन्तर्गत नगरपालिकाले एक विद्यालयका शिक्षकलाई अर्को विद्यालयमा अतिथि शिक्षकका रूपमा पठाउने गरेको छ । नगरपालिकाले चालु आर्थिक वर्षमा चार विषयका शिक्षकलाई अतिथि शिक्षकका रूपमा नियुक्ति गरी विद्यालय पठाएको नगरपालिकाका नगर शिक्षा अधिकारी धनप्रसाद पोख्रेलले बताउनुभयो ।

नगरपालिकाले सामुदायिक र संस्थागत विद्यालयका शिक्षकलाई अतिथि शिक्षकका रूपमा अर्को विद्यालयमा पठाउने गरेको छ । शिक्षण क्रियाकलाप बढाउनका तथा अनुभव साटासाट गर्ने उद्देश्यले अन्तरविद्यालय सम्बन्ध सम्बन्ध बढाउन उक्त कार्यक्रम लागु गरिएको हो ।

“अन्य विद्यालयमा गई पढाउदा शिक्षक र विद्यार्थी दुवैलाई नयाँ सिकाइ र अनुभव प्राप्त हुन्छ” पोख्रेलले भन्नुभयो– “जुन विद्यालयमा नियुक्त भयो, त्यही विद्यालयबाट अवकास हुने पनि धेरै छन् । आफ्ना सिप र अनुभव वर्षौंसम्म एउटै विद्यालयमार्फत बाँड्नेबाहेक केही हुँदैन । त्यसैले अर्को विद्यालयमा पुगेर आफ्नो ज्ञान, सिप र शैली बाँड्दा शैक्षिक गुणस्तरमा वृद्धि हुने अपेक्षा लिएका छौँ ।”

यसबारे नगरप्रमुख वशन्तकुमार श्रेष्ठले भन्नुभयो– “कार्यक्रमअन्तर्गत एक दिन आफ्नो विद्यालयमा आउने अतिथि शिक्षकले अध्यापन गराएको अवलोकन गर्ने र अर्को दिन अतिथि शिक्षक भएर आएको विद्यालयमा आफू अतिथि शिक्षकका रूपमा पढाउन जाने कार्यक्रम बनाइएको छ ।”

उहाँका अनुसार नगरपालिकाले चालु आर्थिक वर्षको नीति तथा कार्यक्रममै यो कार्यक्रम समावेश गरेको थियो । चालु आवमा गणित विषयमा मात्रै अतिथि शिक्षक लागु गरिएको र आगमी वर्ष सबै विषयमा अतिथि शिक्षक लागु गरिने उहाँको भनाइ छ ।
नगरपालिकाका संस्थागत र सामुदायिक विद्यालयका हरेक विषयका विषयगत शिक्षकले अब अन्य विद्यालयमा पुगेर अनिवार्य कक्षा सञ्चालन गर्नुपर्ने नगरपालिकाका शिक्षा अधिकृत गौरव रानामगरले बताउनुभयो ।

कक्षा सञ्चालन गर्दा जुन विद्यालयमा जुन विषयको शिक्षक पुग्छ, सोही विषयको शिक्षकले विद्यार्थीसँगै अतिथि शिक्षकको अनुभव सिक्नुपर्ने छ ।

हाल नगर क्षेत्रभित्रका २४ ओटा सामुदायिक र १६ ओटा संस्थागत विद्यालयमा उक्त कार्यक्रम सञ्चालन गरिएको छ । कक्षा सञ्चालन जुन विद्यालयको विषयगत शिक्षकले कक्षा जहाँ पुर्‍याएको छ, त्यहीँबाट सञ्चालन गर्ने गर्छन् । शिक्षकले अर्को विद्यालय जाँदा आफ्नो विद्यालयले अवलम्बन गरेको असल अभ्यासबारेमा प्रध्यानाध्यापक तथा विषयगत शिक्षकलाई जानकारी दिनेछन् भने आफूले अध्यापन गरेको पाठको पाठयोजनासहितको प्रतिवेदन विद्यालयमा र शिक्षा शाखामा बुझाउनुपर्ने छ । (रासस)