रेवाडी (भारत) । मूल प्रवाह अखिल भारत नेपाली एकता समाज नगर समिति रेवाडीले सडक दुर्घटनामा खुट्टा गुमाएका एक नेपाललाई ह्वीलचेयर प्रदान गरेको छ ।
मूल प्रवाहले चितवनका सुरेश कुमारलाई ह्वीलचेयर प्रदान गरेको हो ।रेवाडीमा आयोजित एक कार्यक्रममा रोटरी क्लब रेवाडी रायल्सबाट प्राप्त ह्वीलचेयर मूल प्रवाह अखिल भारत नेपाली एकता समाजका केन्द्रीय सदस्य ज्ञान प्रसाद शर्माले हस्तान्तरण गर्नुभयो ।
तीन वर्षअघि भएको सडक दुर्घटनामा सुरेशले एउटा खुट्टा गुमाएका थिए । उनको उद्धार गरी उपचारको जिम्मासमेत त्यतिबेला मूल प्रवाहले नै लिएको थियो ।
दुर्घटनामा एउटा खुट्टा काटिएको र लावारिस स्थितिमा रहेका उनलाई मूल प्रवाहले रोहतकको पीजीआईमा पठाएको थियो । चिकित्सकको लापरबाहीले उनको खुट्टाको घाउ बल्झिएको मूल प्रवाहले थाह पाएपछि फेरि नयाँ शिराबाट उपचार गरिएको थियो ।
घटनाको दौरानमा उनकी १२ वर्षीय छोरी पनि थिन् । उनलाई उद्दार गरी रेवाडीको धारूहेडामा सरकारी अनाथआश्रममा पठाइएको थियो ।
अहिले छोरी त्यहीँ बसेर पढाइ गर्दै छिन् । बाउ सुरेश कुमारले मन्दिरको बाहिर बसेर भीख माग्ने काम गरिरहेका छन् । अब व्हीलचेयर पाएपछि उनी खुसी भएका छन् ।
नगर समितिका उपाध्यक्ष विष्णुप्रसाद भण्डारीको अध्यक्षतामा आयोजित कार्यक्रममा समसामयिक राजनीति र भारतमा नेपालीहरुको अवस्थाबारे चर्चा गरियो ।
त्यस दौरान रोटरी क्लब रेवाडी रायल्सकोतर्फबाट जरूरतमन्दहरूको लागि वर्षभरी चलाएको कार्यक्रमको समीक्षा रिपोर्ट पनि प्रस्तुत गरिएको थियो ।
कार्यक्रममा केन्द्रीय सदस्य ज्ञान प्रसाद शर्माले मूल प्रवाह अखिल भारत नेपाली एकता समाजको मातहतमा हुने राजनीतिक र सामाजिक गतिविधिहरूबारे प्रकाश पार्नु भयो ।
उहाँले नेपाली नागरिकहरूको हक र अधिकार तथा रोजगारीको दौरान आइपर्ने समस्याहरूको समाधान गराउनुमा संगठनले निभाएको भूमिकाबारे विस्तारपूर्वक सम्बोधन गर्नु भयो ।
कार्यक्रमको दौरान नगर सिमिति कोषाध्यक्ष जोगबहादुर आले, सदस्य प्रेम अधिकारी, वीरू पुन, महिला विभागकी संयोजक शान्ति घिमिरे, हिमलाल अधिकारी र अन्य स्थानीय नागरिकहरूको उपस्थिति थियो ।
