हेम बिजी, चिदम्बरम ।
मूल प्रवाह अखिल भारत नेपाली एकता समाज चिदम्बरम नगर समितिको आयोजनामा राष्ट्रघाती नागरिकता विधेयक र नेपाली भूभाग गाभिएको अखण्ड भारतको नक्सा विरुद्धमा विरोध सभा सम्पन्न गरेको छ ।
मूल प्रवाहका केन्द्रीय सदस्य बालाकृष्ण गायकले जन्मको आधारमा अंगिकृत नागरिकता लिएकाहरुले वंशजको नागरिकता पाउने नागरिकता विधेयक हालै राष्ट्रपतिबाट प्रमाणीकरण भएको नागरिकता विधेयक राष्ट्रघाती भएको बताउनु भयो ।
उहाँले भन्नुभयो–‘निक्रिय भई सकेको विधेयक फेरी प्रमाणीकरण गर्नु असंवैधानिक र गैरकानुनी कार्य हो। साम्राज्यवादी भारतले लुम्बिनी, कपिलवस्तु र विराटनगरका नेपाली भूभाग गाभेर जुन आफ्नो नयाँ संसद भवनमा अखण्ड भारतको नक्सा राखेको छ त्यो नेपालको राष्ट्रियता, सार्वभौमिकता र अखण्डता विरुद्ध छ ।’ उहाँले राष्ट्रिय स्वाधिनता जोगाउन देश प्रवासबाट देशभक्त नेपालीहरु संघर्षमा उठ्नु पर्ने समय आएको पनि बताउनु भयो।
क्षेत्रीय सदस्य नारायण शर्माले राष्ट्रघाती नागरिकता विधेयक, जन्मकैद तोकिएको जघन्य अपराधीलाई आममाफी दिने र सत्ताको लागि जुन राष्ट्र विरुद्ध जुन गतिविधि भई रहेका छन् तब राष्ट्रियता बचाउन राष्ट्रवादी आन्दोलनको विकल्प नभएको बताउनु भयो ।
त्यस्तै, महिला विभागबाट खेम कुमारी जिसी र विद्यार्थी विभागबाट विनोद जिसीले पनि सम्बोधन गर्नुभएको थियो । हेम बिजीको सञ्चालनमा भएको कार्यक्रममा सुर्यमान गिरीको अध्यक्षता तथा गोकूल बहादुर गायकले स्वागत गर्नु भएको थियो।
