काठमाडौं । नेपाल कम्युनिस्ट पार्टी (मसाल) ले नेपालको लोकतन्त्रविरुद्ध साम्राज्यवादी र प्रतिगामी तत्वबीच साँठगाँठ हुने सम्भावना रहेको औँल्याएको छ। हालै बसेको मसाल केन्द्रीय कार्यालयको बैठकले यस्तो सम्भावना औँल्याएको हो ।

बैठकका निर्णयबारे जानकारी दिँदै महामन्त्री मोहनविक्रम सिंहले भुटानी शरणार्थी प्रकरण र राजनीतिक अस्थिरताको फाइदा राजावादीहरुले उठाउन खोजेको आरोप पनि लगाउनुभएको छ ।

मसालले अमेरिकी साम्राज्यवादविरुद्ध जारी मेची महाकाली अभियानले साम्राज्यवादविरुद्ध जनचेतना जगाउन भूमिका खेल्ने विश्वास पनि लिएको छ ।

यस्तै, मसालले गणतन्त्र र धर्मनिरपेक्षताको रक्षाका लागि आउने शक्तिहरुसँग गठबन्धनलाई निरन्तरता दिनुपर्ने आवश्यकतामा जोड दिएको छ ।

वक्तव्यको पूर्णपाठ
आज २०८० साल जेठ ०३ गते उपलब्ध केन्द्रीय सदस्यहरू सहित बसेको ने.क.पा (मसाल)को केन्द्रीय कार्यालयको बैठकले देशको वर्तमान राजनीतिक स्थितिमाथि गम्भीरतापूर्वक छलफल गरेर महत्वपूर्ण निष्कर्षहरू निकालेको छ । ती निष्कर्षहरूबारे जानकारी गराउन यो वक्तव्य जारी गरिएको छ ।

१. यो बताउँदा हामीलाई खुसी लागिरहेको छ कि अमेरिकी साम्राज्यवादका विरूद्ध मेचीमहाकाली अभियान यही जेठ ०१ गते कञ्चनपुरको महेन्द्रनगरबाट र बाग्लुङको बाग्लुङ बजारबाट प्रारम्भ भएको छ । त्यसबाट नेपालमा बढिरहेको अमेरिकी साम्राज्यवादका विरूद्ध जनचेतना उठाउन महत्वपूर्ण योगदान पुग्नेछ भन्ने हामीले विश्वास गरेका छौँ ।

२. नक्कली भुटानी शरणार्थीको सन्दर्भमा उच्च राजनीतिक र प्रशासनिक स्तरमा देखा परेको ठूलो पैमानको भ्रष्टाचारप्रति हाम्रो पार्टीले गम्भीर चिन्ता र क्षोभ प्रकट गर्दछ । त्यस प्रकारको भ्रष्टाचार सामान्य प्रकारको भ्रष्टाचार मात्र नभएर नेपालका नागरिकहरूलाई विदेशी नागरिक बनाएर नेपालको राष्ट्रियतामाथि समेत गम्भीर आँच पु¥याउने कार्य गरिएको छ । त्यसकारण उक्त भ्रष्टाचारसित सम्बन्धित सबै दोषीहरूमाथि निष्पक्ष र कडाइपूर्वक कारवाही गर्नुपर्ने आवश्यकतामा हाम्रो पार्टीले विशेष जोड दिन्छ ।

३. नक्कली भुटानी शरणार्थी समस्या व्यापक रूपमा देखा परेको भ्रष्टाचार र गम्भीर बन्दै गएको राजनीतिक अस्थिरता समेतबाट फाइदा उठाएर अहिले देशमा प्रतिगमन र साम्राज्यवादको समेतको खतराले गम्भीर रूप लिँदै गएको देखिन्छ । त्यसबाट गणतन्त्र, धर्मनिरपेक्षता तथा देशको राष्ट्रियता र सार्वभौमिकता समेतका विरूद्ध खतरा बढ्दै गएको देखिन्छ । त्यो अवस्थामा प्रतिगमन र साम्राज्यवादका विरूद्धको सङ्घर्षमा विशेष जोड दिनु अहिलेको राष्ट्रिय आवश्यकता भएको छ ।

४. देशमा प्रतिगमनको खतरा गम्भीर बनेको हुनाले त्यसका विरूद्ध आउने राजनीतिक शक्तिहरू विचको गठबन्धन अहिले देशको गम्भीर राष्ट्रिय आवश्यकता भएको छ । त्यही प्रकारको खतरामाथि ध्यान दिएर नै हामीले कैयौँ राजनीतिक शक्तिहरूसित गठबन्धन वा चुनावी तालमेल गरेका थियौँ र अहिले पनि प्रतिगमनको खतरा बढ्दै गएको हुनाले त्यस प्रकारको गठबन्धन अहिले पनि उचित र आवश्यक छ भन्ने हाम्रो पार्टीको ठहर छ ।

५. हाम्रो पार्टीको आठौँ महाधिवेशनले सामन्तवाद र भारतीय साम्राज्यवादसितको अन्तर्विरोधलाई प्रधान अन्तर्विरोध भएको निर्णय गरेको छ र अहिले पनि हामीले त्यो निष्कर्षलाई सही ठान्दछौँ । त्यसका साथै दलाल र नोकरशाही पुँजीपति वर्ग र अमेरिकी साम्राज्यवादसितको अन्तर्विरोधलाई पनि हामीले गम्भीर रूपमा लिएका छौँ । पछिल्ला दिनहरूमा अमेरिकी साम्राज्यवादसित अन्तर्विरोधले अरू तीब्र र गम्भीर रूप लिँदै गएको छ । खास गरेर अब त्यसले नेपालमा सीआइएको प्रत्यक्ष निर्देशनमा चल्ने राजनीतिक पार्टी कथित “स्वतन्त्र पार्टी” बनाएर संगठित र योजनाबद्ध प्रकारले काम गर्न थालेको हुनाले त्यसका विरूद्ध संघर्षमा जोड दिनुपर्ने आवश्यकता पहिले भन्दा बढेर गएको छ ।

६. गणतन्त्र र धर्मनिरपेक्षता समेतको रक्षाको लागि अहिलेको सरकालाई समर्थन गर्ने हाम्रो पार्टीले जुन नीति लिएको छ, हाम्रो त्यो नीति अहिले पनि उचित र आवश्यक छ भन्ने हाम्रो मत रहेको छ । किनभने अहिलेको सत्ता पक्षसित हाम्रा कैयौँ गम्भीर राजनीतिक मतभेदहरू भएपनि उनीहरू गणतन्त्र र धर्मनिरपेक्षताका पक्षमा नै छन् भन्ने हाम्रो विश्वास रहेको छ । जुन तत्वहरू गणतन्त्र र धर्मनिरपेक्षता समेतका विरूद्धमा छन् , उनीहरूले नै वर्तमान सरकार वा अहिलेको गठबन्धनको विरोध गरिरहेका छन् । त्यसैले अहिलेको सरकार वा गठबन्धन टुट्यो भने त्यसबाट प्रतिगमनलाई नै मदत पुग्ने छ र त्यसको असर गणतन्त्र र धर्मनिरपेक्षता समेतमाथि हुने छ । त्यस्तो खतराबाट देशलाई बचाउनका लागि अहिलेको सरकार वा गठबन्धन कायम रहनुपर्ने आवश्यकतामा हाम्रो पार्टीले जोड दिएको छ ।

७. प्रतिगमनका विरूद्ध वा गणतन्त्र र धर्मनिरपेक्षताको रक्षाको लागि हाम्रो पार्टीले वर्तमान सरकार र गठबन्धनलाई समर्थन गरेपनि उनीहरूसित मतभेद भएका विषयहरूमा उनीहरूका विरूद्ध संघर्ष गर्ने हाम्रो स्पष्ट नीति हुने छ । हाम्रो के सोचाइ रहेको छ भने वर्तमान सरकारले भारतीय वा अमेरिकी साम्राज्यवादप्रति ढुलमुल र सम्झौतापरस्त नीति अपनाउने गरेको छ र त्यस प्रकारको नीतिको हामीले सम्झौताहीन प्रकारले विरोध गर्दछौँ । सरकारले अगाडि ल्याएको नागरिकता विधेयकप्रति पनि हाम्रो गम्भीर मतभेद छ । अहिले अगाडि आएको नक्कली भुटानी शरणार्थीका सन्र्भमा पनि दोषीहरूलाई उनीहरूको अपराध अनुसार सजाय गर्नुका सट्टा उनीहरूलाई सफाइ दिन पर्दाभित्रबाट प्रयत्न ता भइरहेको छैन ? त्यो शङ्का पनि उठ्न थालिरहेको छ । ती सबै प्रश्नहरूबारे हामीले विरोध वा सङ्घर्षको नीतिलाई दृढतापूर्वक अगाडि लैजाने हाम्रो नीति रहने छ ।

८. जस्तो कि माथि उल्लेख गरियो, आज गणतन्त्र र धर्मनिरपेक्षता र राष्ट्रियता समेतका विरूद्ध जुन खतरा बढ्दै छ, ती प्रतिगामी र साम्राज्यवादी उद्देश्यहरू पूरा गर्नको लागि नेपालका प्रतिगामी शक्ति र विदेशी साम्राज्यवादी शक्तिहरूको विचमा साँठगाँठ बढ्दै जाने सम्भावना पनि बढ्दै गइरहेको छ । देशभित्रका प्रतिगामी शक्तिहरूले आफ्ना स्वार्थहरू पूरा गर्नको लागि विदेशी साम्राज्यवादी शक्तिहरूका अगाडि आत्मसमर्पण गर्दै जाने तथा विदेशी साम्राज्यवादी शक्तिहरूले आफ्ना साम्राज्यवादी स्वार्थहरू पूरा गर्न देशभित्रका प्रतिगामी शक्तिहरूलाई संरक्षण र उपयोग गर्दै जाने सम्भावनालाई अस्वीकार गर्न सकिन्न । त्यो क्रममा साम्राज्यवादी शक्तिहरूले देशभित्र लोकतान्त्रिक प्रणालीलाई समाप्त गरेर फासिष्ट शासन कायम गर्ने खतरा पनि अत्यधिक छ । त्यस प्रकारको पृष्ठभूमिमा सबै प्रतिगामी र साम्राज्यवादी शक्तिहरूका विरूद्धको सङ्घर्षमा जोड दिनु अहिलेको ऐतिहासिक आवश्यकता भएको छ । त्यो प्रश्नमा जनता कहाँसम्म सचेत हुनेछन् र सङ्घर्षमा उत्रिने छन् ? त्यसले नै देशको भविष्यलाई निर्धारित गर्ने छ ।’
२०८० जेठ ०३ गते ।
मोहनविक्रम सिंह
महामन्त्री