मेघराज रिस्मेली, जापान ।
जापनमा बस दुर्घटना हुँदा दुई जना नेपालीको ज्यान गएको छ। जापानी सञ्चार माध्यमले जनाए अनुसार काभ्रेका नवराज तामाङ र युवराज थापाको दुर्घटनामा मृत्यु भएको हो।
थापा सेन्मोन गाक्कोउ र तामाङ निहोनगो गाक्कोउमा अध्ययनरत रहेको पनि सञ्चार माध्यमले जनाएका छन्।
सेन्दाई शहरबाट तरकारी कम्पनीमा काम गर्न ईवाते जाँदै गरेको बसलाई ट्रकले ठक्कर दिँदा दुई नेपाली विद्यार्थीसहित ३ जनाको मृत्यु भएको हो । दुर्घटनामा एक जना गम्भीर घाइते भएका छन् ।
मंगलबार बेलुका ८ः१५ बजेतिर कुरिहाराको वाकायानागीस्थित तोहोकु एक्सप्रेसवे डाउन लाइनको मुख्य लाइनमा रोकिएको बसलाई ट्रकले ठक्कर दिँदा दुर्घटना भएको प्रत्यक्षदर्शीले बताएका छन् ।
ट्रकका चालक गम्भीर घाइते भएका छन् । प्रहरीले थप अनुसन्धान गरिरहेको छ ।
सेन्दाईबाट ईवातेका लागि हिडेको बस केहि समय पछि बिग्रिएको र बसमा नेपालीसहित ४१ जना सवार रहेको कुरिहारा नगरपालिकाले जनाएको छ । गुडिरहेको बसमा केही खराबी देखिएपछि आवश्यक चेकचाँजको लागि सो बस रोकिएको थियो ।
रोकिएको बसबाट सवार सबै यात्रुलाई ओराली बसका चालकले मर्मत गर्ने क्रममा ती दुई नेपाली विद्यार्थीहरुले सहयोग गरेको अवस्थामा पछाडिबाट ट्रकले ठक्कर दिँदा दुई ती विद्यार्थीसहित बस चालक जापानिज नागरिकको घटनास्थालमा नै मृत्यु भएको बताइएको छ ।
