टेकराज भुसाल, बुटवल ।
प्रदेश ५ को अस्थायी राजधानी बुटवलमा अवस्थित कालिका मानवज्ञान माविका विद्यार्थी र बेलायतको लेसिस्टर सिटीमा रहेको मे फलवर प्राइमरी स्कूलका विद्यार्थीबीच सिकाई सहकार्य भएको छ ।
कालिका मानवज्ञानका कक्षा ४ र ५ मा अध्ययनरत विद्यार्थीहरुले बिगत ५ महिनादेखि बेलायतको सो विद्यालयसँग जिरो वेस्ट नामक सिकाई परियोजना गरेका हुन् । यस अन्तरगत विद्यार्थीहरुले प्लास्टिकजन्य फोहरमैलाई कसरी न्युनीकरण गर्न तथा पुनः प्रयोग गर्न सकिन्छ भनि बिभिन्न क्रियाकलापहरु गरी बेलायतका विद्यार्थीहरुसँग सिकाई आदान प्रदान गरेका छन् ।
कालिका मानवज्ञानका आईएसए संयोजक इबराज तिवारीका अनुसार विद्यार्थीहरुले मस्तिष्क मन्थन, स्पिच कम्पिटिसन, निबन्ध लेखन, चित्रकला, काम नलाग्ने प्लास्टिकका बोत्तलहरुको कृषिमा प्रयोग, प्लास्टिकको बोत्तलबाट चौपारी निमार्ण जस्ता कार्यहरु गरी बेलायतका विद्यार्थीहरुलाई पठाएका थिए । बेलायतका विद्यार्थीहरुले पनि बेलायतमा गरेका कृयाकलाप कालिकाका विद्यार्थीहरुलाई पठाई सिकाई आदान प्रदान गरेका थिए ।
यसै क्रममा यस परियोजनाको अवलोकन गर्नको लागि बेलायतबाट क्रीश बाउन्ड्सको नेतृत्वमा ६ जना शिक्षकहरु कालिका मानवज्ञान माविको अध्ययन भ्रमणमा आएका थिए । अवलोकन गराउँदै विद्यालयका प्राचार्य घनश्याम पाठकले यस्तोखालको परियोजनाबाट सिकाई दिगो भएको बताउनु भयो ।
यस्तै विद्यालयका अध्यक्ष होम बहादुर गलामीले ब्रिटिश काउन्सिल मार्फत गरिएका यस्ता खालका सिकाई परियोजनाले शिक्षण सिकाईमा अन्यन्तै राम्रो प्रभाव पारेको बताउनुभएको थियो । कार्यक्रममा विद्यार्थीहरुले राष्ट्रियता झल्कने गित तथा नृत्य प्रस्तृत गरेका थिए ।
