काठमाडौं । नेपाल कम्युनिष्ट पार्टी (मसाल) ले बर्तमान केपी ओली सरकारको दुई वर्षे कार्यकालको समीक्षा गर्दै सरकारले गणतन्त्र र धर्म निरपेक्षताका सम्बन्धमा लिएको अडानको सह्राना गरेको छ । तर, महंगी नियन्त्रण, भ्रष्टाचार र शान्तिसुरक्षाका सन्दर्भमा सरकार असफल भएको ठहर गरेको छ ।
मंगलबार महामन्त्री मोहन विक्रम सिंहले जारी गर्नुभएको वक्तव्यमा ओली सरकारले गणतन्त्र, धर्म निरपेक्षताविरुद्ध तथा संविधानमा राष्ट्रघाती संशोधनका लागि भएका प्रयास असफल पारेकोमा स्वागत गर्दै आफ्नो अडानलाई निरन्तरता दिन आग्रह गर्नुभएको छ ।
‘वास्तवमा आज राजावादी सहित देशमा सबै प्रतिक्रियावादी शक्तिहरू तथा भारतीय साम्राज्यवादले समेत गणतन्त्र र धर्मनिरपेक्षताका विरुद्ध अभियान चलाउँदै आएका छन् । त्यो अवस्थामा गणतन्त्र र धर्मनिरपेक्षताका प्रश्नहरू राष्ट्रिय महत्वका विषयहरू भएका छन् । त्यसप्रकारको पृष्ठभूमिमा उक्त विषयहरूमा सरकारले लिएको अडानले विशेष महत्व राख्दछ।’ महामन्त्री सिंहद्वारा जारी वक्तव्यमा उल्लेख छ ।
यस्तै, मधेशवादीहरूले संविधानमा संशोधनका लागि गरेका प्रस्तावहरूलाई पनि सरकारले दृढतापूर्वक अस्वीकार गरेको तथा पहिलेका सबै सरकारहरूले भन्दा बेग्लै ओली सरकारले कालापानीबाट भारतीय सेना हट्नुपर्ने कुरा स्पष्टरूपमा बाहिर ल्याएको छ भन्दै सरकारका यी नीतिहरूलाई पार्टीले सकारात्मक रूपमा लिएको उल्लेख गरिएको छ ।
तर सरकारका उक्तयुक्त कतिपय सकारात्मक नीतिहरू बाहेक समग्ररूपमा सरकारको दुईवर्षे कार्यकाल असफल भएको मसालले जनाएको छ ।
सरकारले समाजावाद उन्मुख नीति प्रति प्रतिबद्धता प्रकट गरेपनि त्यसका नीति वा कार्यक्रमहरू पुँजीवादी र यथास्थितिवादी प्रकारका रहेका, एकपछि अर्को गर्दै भ्रष्टाचारका कैयौँ काण्डहरू भएको निर्मला पन्तको बलात्कार र हत्यासम्बन्धी मुद्दाका अपराधिहरूलाई पत्ता लगाउन सरकार असफल भएको मसालले जनाएको छ ।
विकाससम्बन्धी बजेटको ठूलो अंश खर्च हुने नसकेको, देशमा महङ्गी लगातार बढ्दै गइरहेको तथा स्वयं सरकार वा सत्तारूढ संगठनमा माफिया वा भ्रष्ट तत्वहरूको प्रभाव बढ्दै गइरहेको र त्यसबाट बाहिर निस्कन सरकार असमर्थ भएको छ भन्दै वक्तव्यमा भनिएको छ, ‘वास्तवमा भन्ने हो भने तिनीहरूका अगाडि सरकार लाचार बन्दै गइरहेको छ । देशको अर्थतन्त्र धराशायी बन्दै गइरहेको छ । देशमा विदेशी पुँजीको प्रभाव र नियन्त्रण बढ्दै गइरहेको छ ।’
यो पनि पढ्नुहोस्ः आईपीएसको अंग होइन भनेर एमसीसी पारित गराउने प्रयास आपत्तिजनकः मसाल
