काठमाडौं । अखिल नेपाल किसान महासंघ (अप्फा) सहित विभिन्न ६ किसान संगठनले प्रधानमन्त्री पुष्पकमल दाहाल प्रचण्डलाई ६५ बुँदे मागपत्र बुझाएका छन् ।
किसानका तत्कालिन र दीर्घकालिन माग समेटेर प्रधानमन्त्रीलाई ज्ञापन बुझाएको अप्फाका अध्यक्ष भैरवराज रेग्मीले जानकारी दिनुभयो ।
अखिल नेपाल किसान महासङ्घ (अप्फा), अखिल नेपाल किसान महासङ्घ (क्रान्तिकारी केन्द्र), अखिल नेपाल किसान महासङ्घ, अखिल नेपाल किसान महासङ्घ (क्रान्तिकारी), अखिल नेपाल किसान यूनियन र अखिल नेपाल प्रगतिशील किसान सङ्घका प्रतिनिधिले ज्ञापन पत्र बुझाएका हुन्।
महासंघका अध्यक्ष रेग्मीले ६५ बुँदे माग पूरा गराउन किसानसँग आवद्ध संघ संगठनहरु एकताबद्ध भएर दबाब दिनुपर्ने बताउनुभयो ।
आइतबार भएको नेकपा (एकीकृत समाजवादी) निकट अखिल नेपाल किसान महासङ्घको ७३ औँ स्थापना दिवसका अवसरमा रेग्मीले सो माग पूरा भए किसानका धेरै समस्या समाधान हुने बताउनुभयो ।
कार्यक्रममा उपस्थित कृषि तथा पशुपन्छि विकासमन्त्री डा. वेदुराम भुसालसँग किसानहरुका माग सम्बोधन गर्न आवश्यक भूमिका खेल्न पनि रेग्मीले आग्रह गर्नुभयो ।
१० लाख ३० हजार हेक्टर कृषियोग्य जमिन बाँझो
कार्यक्रममा कृषि तथा पशुपन्क्षी विकासमन्त्री भुसालले १० लाख ३० हजार हेक्टर कृषियोग्य जमिन बाँझो रहेको जानकारी दिनुभयो ।
कूल ५१ अर्बको बजेटमध्ये ३१ अर्ब मलमा, १२ अर्ब स्थानीय र प्रदेशमा तथा आठ अर्ब कर्मचारीको तलबमा खर्च हुने गरेको जानकारी दिँदै उहाँले किसानलाई सहयोग गरी यस क्षेत्रको विकास गर्न थप बजेट व्यवस्थापन गर्नुपर्ने बताउनुभयो ।
मन्त्री भुसालले किसानमाथि हुने शोषण अन्त्य गर्न अखिल नेपाल किसान सङ्घको स्थापना गरिएको भन्दै उनीहरुलाई मल, बीउ विजन, सिँचाइ, बजारीकरण, यान्त्रिकरण तथा पूर्वाधारको विकास गर्नुपर्ने बताउनुभयो । खाद्य संप्रभुताको नियामावली बनाउन सरकार क्रियाशील रहेको जानकारी दिँदै उहाँले त्यसलाई अगाडि बढाउन कानुन र अर्थ मन्त्रालयसँग समन्वय भइरहेको बताउनुभयो ।
महासङ्घका अध्यक्ष बलराम बाँस्कोटाले देशको विकास र जनताको समृद्धिका लागि कृषि क्षेत्रको विकास गर्नुपर्ने विचार व्यक्त गर्दै सरकारले यो क्षेत्रलाई विशेष प्राथमिकतामा राख्नुपर्ने बताउनुभयो ।
