कृष्ण पचभैया, भोपाल ।
मूल प्रवाह अखिल भारत नेपाली एकता समाजका अध्यक्ष ठाकुर खनालले नेपालका राजनीतिक दलहरु प्रवासी नेपालीको समस्याप्रति गम्भीर बन्न नसेको बताउनुभएको छ ।

एकता समाज नगर समिति भोपालको आयोजनामा मध्य उत्तर भारतको छैठौं क्षेत्रीय सम्मेलनको प्रचारात्मक भेलालाई सम्बोधन गर्दै अध्यक्ष खनालले प्रवासी नेपालीले झेल्नुपरेका अनेकौं समस्यामा सरकार र दलहरु उदासिन बनेको बताउनुभयो ।

अध्यक्ष खनालले भारतमा नेपालीहरू अपहेलनाको शिकार मात्रै हैन, सिमानादेखि नै विभिन्न घटनाहरूको समाना गर्नु परिरहेको बताउनु भयो । बोर्डर चेकिङ पोस्ट, बस अड्डा, रेल स्टेशन, यात्राको दौरान, बजार र कार्यास्थल सबै ठाउँमा नेपालीहरूलाई अपमानित गर्ने, लुटपाट गर्ने गरेका घटनाहरू सबैले भोग्दै आएको विषय भएको उहाँले बताउनुभयो ।

‘सन् १९५० को सन्धिले दिएको अधिकार समान हक, अधिकारको उल्लंघन भएको छ । लामो समयसम्म नोकरी गरेकाहरूलाई डोमिसाईल सर्टिफिकेट र इलिजीविटी सर्टिफिकेट बहानामा पक्का नगर्ने र नोकरीबाट निस्काशन गरेका घटनाहरू समेत भएका छन्’ खनालले भन्नुभयो, ‘नेपालका राजनैतिक दलहरू प्रवासी नेपालीहरूको समस्याबारे उदाशिन छन् ।’

अहिले आधार–कार्ड प्रत्येक कार्यको लागि अनिवार्य बनाइएको र त्यसको अभावमा जीवनयापनको लागि गर्नु पर्ने कार्यहरू मोबाइल फोन कनेक्सन, बच्चाहरूको स्कुल भर्ना, ड्राईविङ लाइसेन्स, बैंक खाता, नोकरी ज्वाइनिङ, यात्रा, यहाँसम्म की बिमारी हुँदा अस्पतालमा उपचारको लागि समेत समस्या पर्ने गरेको उहाँले बताउनुभयो ।

मूल प्रवाह अखिल भारत नेपाली एकता समाजले यसका विरूद्ध न्यायिक तथा सामाजिक राजनैतिक संघर्ष गरि रहेको उहाँको भनाई छ ।

‘बलिदानीपूर्ण आन्दोलनको बलमा स्थापित गणतन्त्र, संबिधान र धर्म निरपेक्षतालाई समेत खतरामा पुर्‍याएका छन्’ खनालले भन्नुभयो–‘राजावादी, राष्ट्रघाती, संदिग्ध नागरिक लगायत सबै एक भएकाछन् । यो अवस्थामा राष्ट्रियता, गणतन्त्र, धर्मनिरपेक्षताको रक्षाको लागि देशभक्त जनतान्त्रिक शक्तिहरू एक भई विभिन्न खाले रास्ट्रघाती, प्रतिगामी, महत्वाकांक्षी, अवसरवादी, दक्षिणपंथीलगायत सबै प्रकारका खराब राजनैतिक विचारका विरूद्ध संर्घष गर्दै नेपालमा आमुल परिवर्तनको लागि अगाडि बढ्नुको विकल्प छैन ।’

नगर समिति उपाध्यक्ष अर्जुन जिएमको अध्यक्षतामा सम्पन्न भएको भेलामा केन्द्रीय समितिका सदस्य ताल बहादुर खड्का, मध्य भारत क्षेत्रीय समिति अध्यक्ष नारायण सापकोटा, क्षेत्रीय समिति सदस्य रमेश रानाको आतित्थ्यता रहेको थियो । त्यस्तै भोपाल नगर एरियाका विभिन्न टोल एवं विभागहरुबाट उपस्थिति रहेको थियो ।