टंक कुँवर, मुम्बई ।
वैदेशिक रोजगारीका लागि भारतको बाटो हुँदै युरोप जान लाग्दा मुम्बई एयरपोर्टमा पक्राउ परेका दुई नेपाली युवालाई मूल प्रवाह अखिल भारत नेपाली एकता समाजले छुटाएको छ ।
लमजुङ र रुपन्देहीका ती दुई युवक नक्कली कागजात लिएर विदेश जान लाग्दा मुम्बई एअरपोर्टबाट पक्राउ परेका थिए । उनीहरुलाई ६० दिनदेखि मुम्बई भाइखोला अर्थवे जेलमा परेका थिए ।
उनीहरुलाई मूल प्रवाहका केन्द्रीय सदस्य टंक कुँवरको नेतृत्वमा चन्द्र सुवेदी, समाजसेवी हिरा कुँवर, सेते गुरुङ लगायतको प्रतिनिधि मण्डलले जेलमुक्त गरेको हो ।
दुवै युवकहरु फर्जी एनओसी र फर्जी भिसाका कारण गिरफ्तारीमा परेका हुन् । धारा ४६०, ४६४ र ४७० अन्तर्गत जेल चलान भएका उनीहरु कोर्टमा चारसिट आएपछि दुई जनाको ४० हजार धरौटी राखेर र चार जनाको जमानात राखि निकालिएको हो ।
केस फाइनल नभएसम्म ती दुई जनालाई मुम्बईमा रहनु पर्ने अदालतले निर्देशन दिएको छ । हालसम्म पासपोर्ट पुलिस प्रशासनको कब्जामा रहेको छ ।
यस्तै, ४ अप्रेलका दिन पनि अन्य दुई जना युवकहरु सोही प्रकारको केसमा पक्राउ परेर जेलमा चलान गरिएको बताइएको छ ।
पछिल्लो समय नेपालीहरु भारतीय बाटो प्रयोग गरेर तेस्रो देश जाने क्रम बढेको छ । तर, दलालहरुले नेपाली युवकलाई फर्जी बकागजात बनाएर ठगी गर्ने गरेको पाइएको छ ।
