काठमाडौँ । प्रगतिशील लेखक सङ्घ केन्द्रीय समितिको आयोजनामा बैसट्ठिऔँ परिसंवाद सम्पन्न भएको छ ।
प्रलेसको केन्द्रीय समितिको आयोजनामा सो कार्यक्रम २०७९ चैत ३ गते शुक्रबार केन्द्रीय कार्यालय बागबजारमा सम्पन्न भएको हो ।
“माक्र्सवादी दृष्टिमा नेपालको शिक्षा प्रणाली” विषयक सो परिसंवाद शृङ्खलामा मन्तव्य राख्दै शिक्षाविद् गुणराज लोहनीले नेपालको शिक्षा, कर्पोरेट प्रणालीले कब्जा गरेको बताउनुभयो ।
निगम पुँजीवादी शिक्षाप्रणालीले अति दक्ष जनशक्तिको उत्पादन त गर्दछ तर त्यो जनशक्ति, विकसित मुलुकका लागि सस्तो श्रमशक्तिमा मात्र प्रयोग भएको शिक्षाविद् लोहनीको धारणा थियो । नेपालमा गणतन्त्र आए पनि शिक्षा र स्वास्थ्य क्षेत्रमा झनै समस्या बढ्दै जानुमा विदेशमुखी शिक्षा प्रणाली मूल कारण भएको उहाँको तर्क थियो ।
प्रलेसका अध्यक्ष डा. मधुसूदन गिरीको अध्यक्षतामा अगाडि बढेको सो कार्यक्रममा आफ्नो विषयवस्तु राख्दै शिक्षाविद् लोहनीले नेपालको शिक्षामा विद्यार्थीहरूको पहुँच कम हुँदै जानुमा बालबालिकाहरू अनुत्पादक श्रममा लाग्नुपर्ने, घरको आर्थिक अवस्था कमजोर हुने, शिक्षाप्रति विश्वास नहुने, पढेपछि अरू देशको लागि काम गर्ने त हो नि भन्ने दृष्टिकोण निर्माण हुनेलगायतका कारण रहेको बताउनुभयो ।
नेपालको शिक्षाप्रणालीमा सुधार ल्याउन कसलाई पढाउने ? के पढाउने ? कसरी पढाउने ? किन पढाउने ? कहाँ पढाउने ? जस्ता प्रश्नलाई सम्बोधन गर्नुपर्ने उहाँको धारणा थियो । अहिलेको बुर्जुवा शिक्षा प्रणालीले एउटा प्राविधिक विद्यार्थी मात्र निर्माण गरेको बताउँदै उहाँले विद्यार्थीहरू संसारलाई बुझ्ने तथा त्यसलाई बदल्ने दिशातर्फ अग्रसर हुनुपर्ने दाबी गर्नुभयो ।
उपाध्यक्ष नमुना शर्माको सञ्चालनका साथ अगाडि बढेको परिसंवाद कार्यक्रमको विषयवस्तुको बारेमा परिसंवाद कार्यक्रमका संयोजक समीर सिंहले प्रस्ट पार्नुभएको थियो । कार्यक्रममा भौतिक उपस्थितिका साथै जुम प्रविधिबाट देशविदेशबाट समेत सहभागिता रहेको थियो ।
कार्यक्रममा डा. कौशिला रिसाल, राम विनय, पार्वती राउत, ईश्वरचन्द्र ज्ञवाली, समीर सिंह, बलभद्र भारती, वैरागी जेठा, अम्बिका दाहाललगायतले पूरक टिप्पणी गर्नुभएको थियो ।
कार्यक्रममा ईश्वरचन्द्र ज्ञवालीको कविता सङ्ग्रह “आलोकका प्रतिबिम्ब” समेत विमोचन गरिएको थियो ।
