खिमराज चालिसे, चंडिगढ ।
भारतको चंडिगढमा श्रीमानबाटै हत्या गरिएकी नेपाली युवतीको मूल प्रवाह अखिल भारत नेपाली एकता समाजको पहलमा दाह संस्कार गरिएको छ ।
नवलपुर जिल्लाको वर्दघाट सुस्तापुर्व, बुलिङटार गाउँपालिका–६ की १९ वर्षीया कमला भन्ने कृष्टिना लोहनीको १० मार्चमा हत्या भएको थियो ।
चंडिगढस्थित किसनगढको एक होटलमा ८ मार्चमा होटल बुक गरेर बसेको सो जोडीमध्ये श्रीमान आशिष १० मार्च बिहान ७ बजे होटलबाट बाहिर निस्किएका थिए । करिब ३ घन्टासम्म नफर्केपछि होटल कर्मचारीहरूले रुम चेक गर्दा रगतले लतपतिएको अवस्थामा कृष्टिनाको शव देखेपछि स्थानीय प्रहरीलाइ फोन गरे । प्रहरीले शव नियन्त्रणमा लिएर अनुसन्धान गर्ने क्रममा फरार आशिष लोहनीलाई मोहालीबाट गिरप्तार गरेको छ । उनलाई प्रहरीले चंडिगढ जेल चलान गरेको छ।
आशिषले अपराधध स्वीकार गरेको प्रहरी एएसआई मोहिन्दर सिंहले बताएका छन्।
आरोपीले होटल बुक गर्दा समेत दाङ जिल्ला निवासी एक युवतीको नागरिकता प्रयोग गरेको पाइएको छ । त्यसबारे मूल प्रवाहका केन्द्रीय सदस्य खिमराज चालिसेको पहल र राजमो दाङका अध्यक्ष गणेश आचार्यको सक्रियतामा पत्ता लागेको हो।
कमलाको दाह सँस्कारका लागि अभिभावक बोलाउन मूल प्रवाहले पहल गरेको थियो । त्यसक्रममा मूल प्रवाहले लराजमो नवलपरासीमार्फत सम्बन्धित गाउँपालिकाका जनप्रतिनिधिसँग आग्रह गरेको थियो । त्यसपछि उनको पालनपोषण गरेका बुबा जयराम लोहनी, भिनाजु नाता पर्ने धनजित सुनार चंडिगढ आएका थिए ।
कमलाको पोस्टमार्टमपछि उनका अभिभावक तथा आफन्त र मूल प्रवाहका नेता कार्यकर्ताहरुको उपस्थितीमा आज चंडिगढमा दाहसंस्कार गरिएको छ ।
