काठमाडौं । सत्तारुढ दलसहित विभिन्न नौ राजनीतिक दलले लोकतान्त्रिक गणतन्त्र रक्षाका लागि एकतावद्ध भएर अघि बढ्ने निष्कर्ष निकालेका छन् ।
आइतबार प्रधानमन्त्री निवास बालुवाटारमा बसेको नौ दलको बैठकले संविधान र लोकतन्त्रमाथि अवाञ्छित गतिविधि बढेको ठहरसहित संविधान रक्षाका लागि एकताबद्ध भएर उभिने निष्कर्ष निकालेका हुन् ।
हालै राजसंस्था पुनर्स्थापनाका लागि भन्दै अभियन्ता दुर्गा प्रसाईंको नेतृत्वमा विभिन्न गतिविधि भइरहेको छ ।
बैठकमा दुर्गा प्रसाईंलगायतका अवाञ्छित क्रियाकलापबारे छलफल भएको राष्ट्रिय जनमोर्चाका महासचिव मनोज भट्टले जानकारी दिनुभयो ।
‘बैठकमा मूलतः दुईवटा विषयमा छलफल भयो । पहिलो कुरा गणतन्त्र र लोकतन्त्रविरुद्ध अवाञ्छित गतिविधि बढेको कुरामा हामी एकमत छौँ । यसको रक्षाका लागि नौ दल एकतावद्ध हुने निष्कर्ष निकाल्यौँ’ भट्टले भन्नुभयो, ‘दोस्रो कुरा, संक्रमणकालिन न्यायलाई विस्तृत शान्ति सम्झौताको भावना अनुसार टुंगोमा पुर्याउनु्पर्छ भन्ने कुरामा बैठकमा छलफल भयो ।’
भट्टले सत्य निरुपण तथा मेलमिलाप आयोग गठन गर्ने र सो सम्बन्धी ऐन ल्याउने विषयमा छलफल भएको जानकारी दिनुभयो । साथै, उहाँले सशस्त्र द्वन्द्वका क्रममा निहत्था जनतामाथि भएका अपराधका घटनामा छानबिन गरी दोषीलाई कारबाही गर्ने राष्ट्रिय जनमोर्चाको माग यथावत रहेको पनि स्पष्ट पार्नुभयो ।
बैठकपछि नौ दलका शीर्ष नेताद्वारा जारी विज्ञप्तिमा भनिएको छ, ‘द्वन्द्वकालिन घटनाबाट पीडित नागरिक एवम् उनका परिवारलाई न्याय दिन आवश्यक विधेयक सम्मानित सर्वोच्च अदातलको फैसला बमोजिम कानून बन्ने गरी संसदको यसै अधिवेशनमा प्रस्तुत गरिने छ।’
यसका साथै, कानून निर्माणका साथै सत्य निरुपण तथा मेलमिलाप आयोग र बेपत्ता पारिएका व्यक्तिको छानबिन सम्बन्धी आयोग गठन गरिने पनि नौ दलद्वारा जारी विज्ञप्तिमा उल्लेख छ।
बैठकले संविधान र लोकतान्त्रिक गणतन्त्रको रक्षाका लागि एकजुट भई अगाडि बढ्ने दृढता व्यक्त गरेको छ।
यस्तो छ ९ दलको बैठकको निर्णय
