नवराज पौडेल, कपिलवस्तु ।
तराई मधेश जनवादी मोर्चाले कपिलवस्तुमा सञ्चालन गरेको जागरण अभियान महाराजगन्ज पुगेको छ । यही माग २२ गतेदेखि सुरु भएको अभियान अन्तर्गत शनिबार महाराजगन्ज नगरपालिकाको शान्ति चोकमा नगरस्तरीय भेलाको आयोजना गरियो ।
भेलाले सारदा यादवको अध्यक्षतामा १३ सदस्यीय तराई मधेश जनवादी मोर्चा नगर समिति गठन गरेको छ । समितिको उपाध्यक्षमा राम छविले पासी, सचिव दिनानाथ शर्मा र कोषाध्यक्षमा शिवपुजन कुर्मी चयन हुनुभएको छ । समितिको सदस्यहरु राम बहादुर ठाकुर, शैलेस कहार, कमलेश पासी, जमिल अहमद , अब्दुल हकिम मुसलमान र बुन्सिधर गुप्ता चयन हुनुभएको छ । यसै गरि सल्लाहकारमा शालिकराम लोहार र हेमन्त चौधरी, रहनु भएको को छ ।
भेलालाई सम्बोधन गर्दै अखिल नेपाल किसान महासंघका केन्द्रीय उपाध्यक्ष शिव पौडेलले तराई मधेशका किसानका नाममा खुलेका केही मधेशवादी दलले जनताको मनोभावना विरुद्ध काम गरेको भन्दै समस्या समाधानको लागि आफै जागरुक हुनुपर्ने बताउनु भयो ।
कार्यक्रममा राष्ट्रिय जनमोर्चाका जिल्ला अध्यक्ष दधिराम आचार्यले राष्ट्रघाती एमसीसी बारे जानकारी दिँदै सरकार दुई तिहाईको बलमा यसलाई संसदबाट पारित खोजेकोले राजमोलगाएत नौ दलले यसको विरुद्धमा आवाज उठाएको बताउनुभयो ।
नेपाल ट्रेड युनियन महासंघका केन्द्रीय सदस्य केयर सिंह अदैले सञ्चालन गर्नुभएको कार्यक्रममा इजाहर अहमदले स्वागत गर्नुभएको थियो ।
