खिमराज चालिसे, चंडिगढ ।
भारतको हिसारमा बलात्कारपछि हत्या गरिएकी ८ वर्षीया बालिका ममता गिरीको परिवारलाई सहयोग जुट्न थालेको छ ।
मूल प्रवाह अखिल भारत नेपाली एकता समाजको पहलमा बालिकाको परिवारलाई विभिन्न खाले सहयोग जुटाइएको हो ।
मूल प्रवाहले कानुनी, प्रशासनिक लडाईंको साथ परिवारलाई आर्थिक सहयोगसमेत गरेको छ । साथै पीडित परिवारको हेरचाहका लागिसमेत मूल प्रवाहले पहल गरिरहेको छ ।
यसैबीच मूल प्रवाहले पीडित परिवारलाई करिब एक लाख ९० हजार रुपैयाँ हस्तान्तरण गरेको छ । शुक्रबार महाराजा अग्रसेन सिनियर सेकेन्डरी स्कुलले प्रदान गरेको नेरु ८१ हजार ६०० नगद र मन्डिको तर्फबाट १ लाख ८ हजार ३२० रुपैयाँ गरी १ लाख ८९ हजार ९२० रुपैयाँ पीडित परिवारलाई हस्तान्तरण गरिएको हो ।
यसको साथै पीडित परिवारको छोरा महेश गिरीलाई कक्षा १२ सम्मको शिक्षाको लागि सबै फिसहरु दिएर महाराजा अग्रसेन सीसी स्कुल हिसारमा पढाउने वर्तमान मण्डीका प्रधान वेद अग्रवालले प्रतिवद्धता गर्नु भएको छ । त्यस्तै, किताब, कापी, पेन र आवश्यक ड्रेसहरु सहयोग गर्ने प्रतिवद्धता व्यापार मन्डलका सदस्य सुशील गुज्जर र सुनिल गुज्जरले जनाउनु भएको छ ।
आज मूल प्रवाह वैकल्पिक केन्द्रीय सदस्य तारा सोमरे, एरिया सदस्य प्रितबहादुर, विशाल बोहरा, हिसार मूल प्रवाहका संस्थापक सदस्य विशाल विष्टको पहलमा र पूर्व प्रधान छबिलदास केडियाको विषेश सहयोगमा व्यापारी, उद्यमी तथा शिक्षण संस्थानहरुमा पुगी पीडितलाई राहत दिलाउने कार्य भएको हो ।
कैलालीको घोडाघोडी–४, शिखरझाला निवासी लक्ष्मण गिरी तथा लक्ष्मी गिरीकी ८ ववर्षीया छोरी ममत गिरीको भारतको हरियाणा राज्यको हिसारमा बलात्कारपछि निर्ममतापूर्वक हत्या भएको थियो ।
पत्रकार महासंघ भारत शाखाद्वारा घटनाको विरोध
यसैबीच नेपाल पत्रकार महासंघ, भारत शाखाले सो घटनाको विरोध गरेको छ ।
‘नेपाल पत्रकार महासंघ भारत शाखा यस्ता बलात्कारी हत्याराहरुप्रति कडाभन्दा कडा कारबाहीको माग गर्दछ। साथै दोषीलाई कुनै पनि हालतमा उम्कन नदिन महासंघ नेपाली राजदूतावासलाई घटनामा सूक्ष्म निगरानी राखेर भारत सरकारलाई ध्यानाकर्षण गराउन पनि माग गर्दछ’ अध्यक्ष देवेन्द्र कुँवरद्वारा जारी विज्ञप्तिमा भनिएको छ ।
साथै, पत्रकार महासंघले प्रवासी नेपालीहरुप्रतिको यस्तो अपराधिक गतिविधि समय समयमा आई नै रहने देखिएकाले यस्ता घटना विरुद्ध कडा कदम चाल्न आग्रह गर्दै भारतभरी यत्र तत्र रुपमा सञ्चालित विभिन्न सामाजिक संघ संस्थाहरुलाई पीडित परिवारलाई न्याय दिलाउने पहलमा ऐक्यबद्धता जनाउन पनि आह्वान गरेको छ ।
